شخص غيرى

ربما لو تلاقينا فى زمن اخر= او لو كنت انا شخص غيرى
لو كنت رايتك ايامى السابقة= كنت احببتك وما عشت حزنى
ولخرجت من ابواب الاحزان= ولكنت تملقت وقهرت يأسى
ولكنى ابدا لن اتغير يوما= ولن تعد الايام لسابق عهدى
فلو بيدى لاخترت عودتى =الى ايام كنت احبوا ايام مهدى
ربما نتلاقى فى وقت اخر= وربما نتعانق من منا يدرى
قد اراك وترين قد تعرفينى= او تذوب ملامحى وتنسى عينى
معزوره ان نسيتى فكيف التذكر= وانا لا اذكر ملامح يوم امسى
بالله عليك بلا دموع ارحلى= ماعدت استطع كفكفتها بكفى
فتلك دموع محرمه عليه لمسها= حبيبتى تلك دموع ملك لغيرى
اعزرينى ان كنت قاسيا عفوا =فالقسوة الايام بكل القسوة علمتنى
اقصد كسرتنى بل حطمتنى بل= دمرتنى بعدما على البكاء عودتنى
لا دعى ذكرياتك لى ولا تاخذيها= فما يبقى لى بعدها انا وحدى
اتركى خطابا اقرأه كل حين= فاسمع صوتك يردد كلماته يكفى
هذا عندى كل الامانى حبيبتى =لعلها تبدو بسيطه ولكن مع غيرى
فانا بقايا انسان تتعذب اياما =اشلاء قلب اصبح شىء غير قلبى
ضعى كلمة احبك فقد تصبح واقعا= ان اصبحت انا شخص غيرى

أول تاج

ده تاج جانى من سنووايت
اذكر عشر اشياء عن نفسك
حاضر يا دكتورة

1- مسلم , مصرى , طبيب قريب ان شاء الله ادعولى ....... قولوا امين

2- باحب الشعر جدا جدا جدا جدا وباعشق كتابته وانا باكتبه باحس انى موجود باكتب من وانا صغير كان عندى 13 سنة , باكتب اغانى برضوة بس لمجرد الكتابة مش اكتر يعنى مش بابيع لدرجة انى ساعات بامشى فى الشارع الناس كلها بتبص عليا وتقريبا بيقولوا اية المجنون ده لا ده اكيد مش تقريبا

3- حزين بدرجة كبيرة ووحيد جدا حتى فى وسط اللمة والناس باحس بالوحدة وفى عز الفرحة باحس بالحزن وان فرحتى مش كاملة , مش عارف ليه الحقيقة ممكن بقيت عقدة عندى موضوع الوحدة والحزن ده بسبب نشأتى , الله اعلم

4- باحب اللمة اوى وباحب الضحك والهزار جدا وباعشق الجو ده برغم الحزن والوحدة اللى باحسهم

5- بيقولوا عنى ناس يعرفونى انى مغرور او بمصطلح اخر تنك بس انا مش كدا هما بيقولوا ده لمجرد انى معتز بشخصيتى ومبسوط بيها لانى انا اللى كونتها وعلمتها بفضل ربنا

6- باتعارف على الناس بسهولة جدا مهما كانت صفاتهم الشخصية و عشان كدا ليا اصحاب ومعارف كتير اوى لدرجة انى ليا اصحاب اكبر منى سنا بكتير وبيعتبرونى صديق مقرب وبياخدوا ارائى وبيعملوا بيها , وليا عمى صاحبى جدا وبرضوة بيعاملنى من المنطلق ده

7- بيقولوا انى علمت نفسى بنفسى زى ماقولت وده بيخلى شخصيتى مش متأثرة باللى حواليا عشان كدا بيستغربوا ازاى انا ابن البيت ده وانا نفسى اشهد بده انى شخصية مختلفه عنهم مفياش منهم غير طيبتهم

8- باحب اساعد الناس طالما فى مقدورى كدا وبازعل اوى اوى لما باحس ان حد مش مقدرنى بعد اللى باعمله ليه وحصلت كتير معايا بس عمرى ما ندمت الحمدلله على مساعدة حد بجد بابقى مبسوط اوى وانا باساعد حد اعرفه باى شىء اقدر اعمله

9- باحب التدريس جدا جدا وكانوا زمان بيقولوا انى هاكون مدرس والحقيقة اديت دروس كتير اوى بس مجانا لمراحل متفرقة ولمواد عمرى ما درستها اخر حاجة كان انجليزى لحد محتاجة انى اساعده فى الثانوية العامة وكان سبب سقوطه كذا مرة , بالاقى نفسى اوى فى التدريس واتمنيت لو اكون طبيب مدرس او مدرس طبيب بس ده مش هيحصل , نصيب الحمد لله

10- اخيرا وليس اخرا مبسوط بالناس اللى بدأت اعرفهم من التدوين ورغم الفترة القصيرة الا ان العالم التدوينى اضافلى حاجات يمكن مش كتير بس اضاف وكفاية معرفة الناس زى سنووايت ورودى واجدع بنوتة وصحفية روشة وساعد نسرين وناس كتير

التاج هابعته خمسة لمين امممممممممممممممممممم صعبة شوية طيب
ساعد نسرين الأيمن
بنوتة مصرية (رودى)
مستجدة ( ربنا يرجعها عشان طولت الغيبة )
وائل (ليه أصحاب بجد)
محمود نميس ( الشارد)

جارى تنفيذ الطلب باخبارهم ومش باعته للى باعتهولى

بلغ اللى بعتهولك بانك نزلته
يا سنوو ياسنووايت انا نزلت التاج يادكتورة يادكتورة التاج اهو

واخيرا فى حاجة غريبة اوى حصلت كذا مرة ليه كتير فاكرنى بنت يمكن عشان اسم wanna الله اعلم بس ياجماعة انا رااااااااجل

وكمان موضوع السماعة عشان خاطر سنووايت

يادكتورة لسببين هى مضيقانى وحاسس بعدم وجودها

الاول لان التعليم عندنا مش عاجبنى جدا وحاسس انى دكتور وناقصه سماعته يعنى انا اللى المفروض ادور عليها واستخدمها ازاى

محدش بيعلمنى الا من رحم ربى

والتانى ان باشوف الدكاترة بيستخدموا السماعة ساعات فى حالات مش محتاجه

لمجرد انهم يدوا انطباع للناس انهم كشفوا عليهم بس

تحياتى
سلالالالالالالالالالالالالالالالالالالالالالالالالالالالالالالالالالالالالالالالام

نحن .... والفتنة

نحن تشير إلينا المسلمين
والفتنة تشير إلى الفيلم القصير الذى انتجه هولندى يدعى "جريت فيلدرز"

فقد وجدت الكثير من المقالات تدعو لمقاطعة بضائع هولندا..... وأنصروا الإسلام أيها المسلمون
وأنصروا الرسول وهذة العبارات الرنانة وكَثر الصخب حول هذة المواضيع

أولا بكل الفخر أنا مع أى إنسان ينصر الرسول الكريم عليه صلوات الله وتسليمه
ومع مقاطعة كل البشر إن أساءوا هم إليه....... ولكن

عندما قام رسام الكاريكاتير الدانماركى برسم الصور المهينه للرسول الكريم كنت مع المقاطعة
لأن دولته قالت إنها حرية أن يسىء إلينا وإلى رسولنا المصطفى صلى الله عليه وسلم ولم تردعه ولم تمنعه او حتى تقول أنه أخطىء

اما ذلك المدعو" جريت" فقد قامت دولته بالأتى
قال رئيس الوزراء" جان بيتر" أنهم رفضوا عرض هذا الفيلم تماما ولا يعنيهم كون هذا الرجل عضوا فى البرلمان
فهو لا يمثل رأى الحكومة
وقد عرض فيلمه فى موقع على الانترنت ...... فما علاقة هولندا ومنتجاتها بهذا

وإن كنت أرى فى الاساس ان هذة المنتجات لا نستخدمها إلا ثلاث او اربع فقط منها وكلها اشياء ثانوية لا تستخدم الا كل حين كنوع من انواع الرفاهية
وارى ان المواطن المصرى البسيط لا يستخدم منها الا نوعا ان سمحت له الظروف لذلك او نوعين
فهل هذة مقاطعه لا والف لا
لانها اولا لم تبنى على اساس سليم
لان الرجل صاحب الفيلم الذى حرف فيه بعض آيات القرأن قالت حكومة دولته انها ضده
وليعلم الجميع انا لا يعنينى شىء فى المدافعه عن هولندا او غيرها
كل ما فى الامر انى اريد ان نفكر قبل ان نتخذ خطوات نحو مواقف

فقبل ان نسال عن اساءتهم هل حافظنا نحن على ما قاله رسولنا الكريم
لا والف لا فانى ارى اناس يقولون المقاطعة لنصرة الرسول منذ ايام مقاطعة الدانمارك الناجحة والمبنيه على اسس صحيحة ومبدء سليم فى معاقبة دولة بمقاطعتها اقتصاديا لانتهاكها حقوقنا
بل ادت هذة الرسومات الى انتشار اكبر للدين

ولكن فلننظر لانفسنا اولا هل نفعل ما امرنا به سيدنا محمد صلى الله عليه وسلم
فلو اننا عملنا باوامره لما جعلنا انفسنا محط هذة الافعال ولا قام احد بتشويه صورتنا لاننا سنكون اقوياء لا تكسر شوكتنا

ولكن موقف الدانمارك كان موقفا قويا منا واحيينا عليه واتمنى لو نقف نحن تجاه ديننا وقفه قوية ونلتزم بتعاليمه

وندرس السيرة النبوية بتمعن
ونرى كيف كان رسولنا يعامل من يسىء اليه كيف كان يرد الاساءة بالحسنى فدينه دين سمح لا يسىء الى المسىء ويجازى المحسن فهو دين سمح يدعو الى التسامح والمحبة لا الى العداوة ولا ان نقابل الاساءة بالاساءة فورا
ولكن ان اصر جاحد او جاهل على الاساءة الينا فهنا يكون ردنا وبكل عنف وقسوة
فلو كانت الاساءة كلاميه نرد عليها وانا زادت الى القتال فالقتال
ومثال الدانمارك خير شاهد
واخيرا فلينظر كما قلت كل منا ويرى هل بداخله حقا تعاليم الرسول الحنيفه ويطبقها ام ندافع فقط عنه كلاما ولا فعل منا تجاه اوامره وتنفيذها كمسلمين نؤدى ما امرنا به

هدومو عروسة

ما تستغربوش اوى كدا ... يابنى مش تتنح هاقولك دلوقت

هدومو عروسة يعنى هدوم (ملابس) للعروسة

ياعينى عالصبر شوفت يابنى الترجمة باعرف صينى او الصينى هو اللى بيعرفنى
الحقيقة ان الصينى هو اللى عرفنا وكشفنا وكل حاجة ممكن نتخيلها

واكبر دليل الشلالات الصينية ( قصدى الدلالات ) بس هما فعلا شلالات وانهمرت مياهها علينا وغمرتنا وغرقتنا

يوووووووووووووووه قول زى ما انت عايز مش كفاية انهم ماليين الاسواق بمنتاجتهم من الإبرة للصاروخ زى ما بيقولوا

بس الصاروخ ده اللى هو بتاع رمضان اللى العيال بتلعب بيه ( بووووووووووم على دماغ ابوهم وامهم )

الحكاية انى قاعد عند عمى وفجأة بنفتح الباب لقيت فى وشى ست مبجلة صينية الشكل لدغة ولا ما اعرف اية بتقول هدومو عروسة وبتنور فى ايدها بكشاف
اهو لو مش عندنا عروسة ناخد كشاف اى سبوبه للبنيه وخلاص
المهم قولنالها شكرا
قالت فى عروسة فوق ؟
قولنالها يمكن

المفروض ان احنا طبعا نرشدها دى ست غلبانه وشقيانه وبتجرى على الصين ( قصدى عيالها اللى فى الصين ) بس اكتشفت ان عيالها واقفين بره مش فى الصين
وطبعا لو دخلناها وقعدت تبيع كالعادة هتطلع من شنطتها كل حاجة وتقولك دى ب 60 دنية اللى هو جنية تقولها ب 20 تقولك ماشى خودها
خدنا ربنا يا شيخة حتى دى عرفتوها ( الفصال )

انا خايف الاقيها مطلعه عربية من شنطتها دى تكون مطبقة وبتتفرد ولا حاجة

بجد نفسى افهم لما احنا بنادى بمنع الباعة الجائلين والكلام ده سايبين دول بيبعوه بأى صفة
يعنى دى ولا خالتك ام محمد الدلالة ولا دى بتاعت الجمعيات جاية تكون جمعية عشان مزنوقه فى قرشين

دى جاية تعرض بضاعة من انتاج بلدها اولا
وتلغى منتجات كتييييييييييير بيسترزق منها ناس من البلد
ومابقوش لاقيين حاجة يبيعوها لان كله عند الست الدلالة فى الشنطة وبارخص الاتمان
ياترى الاقى معاها سماعة دكتور صينى حلوة كدا باتنين جنية ولا حاجة ؟
يا جماعة ارجوكم ارجوكم اوقفوا الشراء منهم مش تدوهم الفرصة يغرقوا اسواقنا ويقفلوا بيوت الناس
الناس دى تعمل اية بجد تعمل اية

اقولكم البسوا وش صينى ولفوا عالبيوت
وقولوا هدومو عروسة