مصطفى

مصطفى ده مش اسمى ولا اسم واحد صاحبى
ده اسم انسان كان نفسه يعيش وتكون العيشه هنيه وهنيه دى مش اختى ولا اخته
لا دى السعادة بكل معانيها فى الدنيا ديه .
بدء مصطفى يبص حواليه ويشوف ويفكر ازاى هيختار حياته ويبدء طريقه...
بص شاف طفل صغير بيحبى على الأرض وأمه غايبه عنه وراها شغل عشان فلوس أبوه مش بتكفى إنهم ياكلوا.
وأبوه مسافر بره ومش جنبه والواد بيصرخ اااااااااااه ومفيش ناس يسمعوه .

بص تانى فى ناحيه تانية شاف عيال كتير فى مدرسة مش لاقيين لا مدرس ولا مدرسة كلهم غايبين سابوا المدرسة وراحوا للدروس المتخصخصة (الخصوصية)
عشان مرتبهم مش مكفى ومش مهم العيال تروح المدرسة.
شافهم قاعدين فى زحمة وضيقة قاعدين على حرف الدكة واللى واقفين فى السكة مش لاقيين مكان .

بص ناحية تانية لقى واحد أكبر شوية بيقولوا عليه فى الثانوية ......
بينط من فوق سور مدرسته رايح فين .... رايح يلعب فى سايبر ولا يشرب شيشة عالقهوة ..... ليه كدا يابنى ؟ ياعم يعنى لو زاكرت هاعمل اية ما انا كدا كدا هاقعد عالقهوة.

بص هناك لقى شاب فى الجامعة سايب محاضرة وواقف مع واحده المفروض انها طالبه ....... يقولوه احضر وزاكر يقولوهم مش فاكر ما أنا هابقى اشترى مزكرة قبل الأمتحان فيها الخلاصة وكله هينجح واللى عايزينه يسقط هيسقط وان نجحت يعنى هاروح فين اهو هنا احسن عالاقل ابويا بيدينى المصروف بعد كدا هاقعد عالقهوة ومش الاقى شغله .........

بص ناحيه تانية لقى واحد أكبر شوية بيجرى ورا الفلوس عايز يلحق يكون نفسه
ويلاقى عروسة تناسبه عشان سنة عدا التلاتين ومش لاقى وقت حتى يسأل على أهله ...
بص ناحية تانية لقى أب بيحوش عشان ولاده يتعلموا وبالعافية يادوب بيقدر يكفيهم
واهو حارم نفسه و حارمهم من حاجات كتييييييييييير ولا لاقى وقت يعترض على حاجة فى دنيته ويجيب منين وقت يعترض.

وبص فى ناحية تانية لقى ناس بتحاول تعترض على الحال اللى مش عاجبهم
ومممنوعين منه ومتكبلين ومبعودين عنه وكل واحد غصب عنه غير كلامه وساب غيره لهمه .

وبص فى الشارع لقى دنيا زحمة ومواصلات مش نافعه ....وشباب عالناصية وبنات ماشيه وضلت طريقها....... وولاد بتشرب أى حاجة تقابلها وتقولك عشان تنسى........ وعيال بتشتم بعضها وتجرى بالعصى وتضرب اهلها.... وأهل متفرقين وأخوات متخاصمين وجيران مش طايقين كلمة من بعضهم ......وناس بتحكم ناس ومفيش عدل عندهم وناس بتكره السلام وناس بتحب تموت بعضها........ وناس عايشه فى الدمار وناس الدمار عشقها
وناس تخون وناس تبيع أرضها وناس تشترى......... وناس بأرخض الأتمان تبيع عرضها
وناس بتاخد حق غيرها ومش بتراعى ضميرها........... وناس بتاخد رشوة فى درج مكتبها عشان تمشى مصلحة غيرها وناس مش باقي عندها ضمير.... وناس ........وناس ......وناس...................

بعد ده كله مصطفى قرر يموت فى بطن امه ومش يتولد للحياة ويعيش اللى عاشه اللى قبل منه .

تاتا خطى العتبة

تاتا دى مش المروحة الصينى اللى مش بتجيب هوا لا
ولا العتبة دى اللى هى جنب الموسكى وفيها محلات أينعم مفيش حد بيشترى بس فى محلات
المهم ان العتبة هى عتبة الكلية كلية اية ؟؟؟ كلية الطب يا جدعاااااااااااااااااااااااااااااااااان .

فى أول يوم دراسة داخلين من الباب لقينا عمنا مسرور اللى واقف عالباب بيقول
الكاررررررررررررنية بعد إذنكم
احنا الدفعة الجديدة مش معانا كارنيهات (ده احنا طبعا بكل فخر بنرد)
طيب بطاقة الترشيح ..........

طبعا بطاقة الترشيح دى مش بتاعت الانتخابات اللى احنا مش بنعملها ولما بنعملها مش بنستخدمها عشان مش بنلاقى حد نرشحه وان لقينا بنلاقى الدنيا زحمة وهرجله فبنروح وناخدها من قصيرها (معايا يا بشر ) والترشيح برضوة مش ترشيح المياه اللى بنشربها ولا حتى ترشيح وتنقية مياة الصرف لاعادة شربها مرة اخرى يع يع يع اه صحيح هما بيكرروها ؟

بطاقة الترشيح دى اللى المفروض بتقول انى ما شاء الله عليا وخمسه وخميسه فى وش اللى ما يصلى عالنبى انى دخلت الطب عشان واد جامد ودحيح وجبت مجموع فى الثانوية.
المهم
طلعت المدرج ومعايا أحمد صاحبى فاكرينه طبعا بتاع عبده ........
وبعدين المدرج ملياااااااااااااااااااااان بشر كله بقا جاى يحضر مفيش مكان نقعد طبعا لاننا جايين متاخر................
ليه !!!!!!!!!!
عشان المواصلات مش موجودة فى المكان اللى ساكن فيه وبتوع الهيئة لو ربنا نتعهم بالسلامة وجم مفيش مكان الا بقا على المرايا واللى موجودين ممنوعين من المشى وشكلنا كدا هنقضيها مشى .

المهم قعدنا على الارض فى اخر المدرج ودخل راجل محترم اوى ولابس بدله وشكله يبان عليه العز دكتور بقا هههههههههههههههههههههههههه .
بدء الراجل فى الشرح وكان يستخدم اللغة الهيروغليفية الحديثة (أقصد الإنجليزية) بس كانت بمثابة هيروغليفى لينا لانه بيقول كلام جديد علينا وكل كلمة يقولها انجليزى فى انجليزى
ومصطلحات غريبة ولا كلمة عربى وكأننا بقالنا سنين فى الكلية وطلع يا اخويا الانجليزى بتاع زمان ده مش انجليزى ( دلوقت عرفت ليه كان بيقوله انجليزى ده يا مرسى )
اتارى الانجليزى حاجة تاااااااااااااااانية خالص ................................
بس كان فى ناس فاهمه

اااااااااااااااااااه دول بقا بتوع المدارس التانية ملناش دعوة احنا
انا طبعا مدارس الحكومة ومالها يعنى ما هى خرجت واد زى الفل ودخل طب اهو .
وكتر خير الحكومة انها عامله مدارس حلوه زى دى وبتخرجنا على الطب
وتعيش الحكووووووووووومة ومدارس الحكوووووووووووومة وتسقط العنطزة .


انتهى الراجل من الكلام والرغى التمام وأنا بارفع ايدى اصقف لقيت احمد بيمسكها

فى اية يابنى عايز اصقف
تصقف اية دى محاضرة يابنى
ياعم وانا مالى انا باشوفهم بيعملوا كدا فى التليفزيون مش بيبقوا فاهمين حاجة وبعدين الراجل يخلص كلام يروحوا مصقفين
هما مين دول يابنى
أنا اعرف اهم ناس كتير رجاله على ستات يوووووووووووه ما تعدش
يابنى اصحى دى كانت محاضرة مش مؤتمر
اااااااااااااااااااااااااه قولى كدا اصلى نسيت احنا فين اصلا كنت نايم لا مؤاخذة
يادى النيلة كله نايم
ما هما برضوة بيناموا ياعم جت عليا ده حتى هنا مفيش تليفزيون يصورنى
كمان يصورك
ايوة ياعم هو أنا شوية
ليه يعنى أنت مين
أنا دكتوررررررررررررررررررررررررررررررررررررررررررررررررر
ههههههههههههههههههههههههههههههههههههههه مش باين يعنى شايفك نايم
ياعم واية يعنى هو الدكتور ما بينامش يعنى
ياعم القمور مش كدا
امال ازاى
يلا يابنى انت مسطول يلا .....يلا يا حبيبى خلينا نروح السكشن
سكشن !!!!!!!!!!!!!!!!!! يعنى اية
هو انت مش من الكلية ولا اية
طبعا من الكلية انت بتقول اية
كلية اية كلية الطب يا جدعاااااااااااااااااااااااااااااااااااااااااااااااااااااااان.

فى إنتظار الصباح

جلست أمام شرفة منزلها تنتظر طوال الليل أن يأتى الصباح , فغدآ يعنى لها الكثير
وقفت أمام مرآتها تتزين , وابتسامة النشوة قد ارتسمت على شفتيها ونظرت فى دولاب ملابسها وأنتقت أروع ما لديها وأرتدته وألتمعت عينيها بريقا كضوء الشمس فى الصباح يملأ أركان الكون . ظلت ترقص وترقص فى أرجاء غرفتها فغدآ موعدها أن تلقى حبيبها .

وجلست مليا تفكر.....
هل أنام ؟ فلربما أحلم به .....
هل أظل يقظة ؟ فأنا فى اليقضة أحلم به ......

ظلت الآفكار تدور بعقلها .......... سأمسك بيده وأخبره ألا يغيب مرة أخرى
ففى الغياب أموت كل لحظة من الوحدة ........ سأمسكها وأرقص معه رقصة جديدة فالرقص بين يديه حياة أخرى ........ سأمسكها وأنام على كفه و أزرف الدموع واحدة تلو الآخرى حتى يعلم كم فى الفراق تزداد اللوعة.......... سأمسكها وأجوب معه الطرقات وأقول هذا حبيبى وأقولها له مع كل خطوة ................. سأمسكها وأقبلها وأقول له كن لى أم أرتمى فى صدرها حين الضيق , كن لى أب يرشدنى حين أََضل الطريق , كن لى صديقا حين أحتاج رفيق , كن لى إبتسامة وقت الضيق , كن صبرا حين لا أطيق , كن عفوا عندما أكون من المخطئين , كن لى نجاة حين أكون من الغارقين , كن .....وكن..... وكن ..... وكن ..... أشياء كثيرة سأخبره بها وحده فأنا ملكه وحده .

ستأتى الشمس بنورها وسيأتى معاها حاملآ أيام عمرى بين عينيه لأعيشها دون حزن سيطغى نوره على نور الشمس وسيعرف الكون كله كم ....أحبه ....أحبه.... أحبه .... أحبه.

كان قلبها يدق فتدق عقارب الساعة وتمشى خطوة يسرع قلبها نبضا فتنظر للساعة لربما يسرعها قلبها وتنظر إلى ساعتها فى ترقب بالله عليكى اركضى اركضى فمرورك هو قرب للحبيب .

جالسه أمام الشرفة وعينيها على الحائط تترقب عقارب الساعة تدور العقارب وتدور الأفكار

فى رأسها والليل يمضى بطيئا وكأنه الدهر كله ولكن الآمل داخلها يجعلها صابره وتفكر فى

كلام ستقوله له حين تراه , كلمات كثيرة قد هيأتها داخل عقلها لتقولها له .

سأقول أحبك بجنون سأخبره بالفم وبالعيون , سأقول أذوب أذوب من الحنين , سأقول لحظة
غيابك تمر سنين , سأقول حبيبى عمرى لو قضيته حبا لك فهو قطعا شىء ضئيل
سأقول ....... سأقول ......... سأقول ...............................

وفى غمرة نشوتها يد تمتد نحو الشرفة تيقظها وتقول لها ماذا بك ........

فتنظر فى ذهول وتعود ذاكرتها فإنه حلمها المعتاد منذ أن فارق حبيبها الدنيا وهى تمنى نفسها

أن تنتظره يوما ويأتى لها فى الصباح مع قدوم الشمس فلقد كانا على موعد فى صباح يوم ولم

يأتى لأنه فارق الدنيا وقتها ومن يومها وهى فى إنتظار الصباح .

زى انهارده

أكيد كله هيسأل اية هو اللى زى انهارده

زى انهارده من كام سنة ساعات بانسى وساعات بافتكر ااااااااااااااااااااااااااااااااااااااه

23 سنة اتولدت فاكرين طبعا اليوم اللى امى جابتنى فيه وجدتى زغرطتلها وابويا هلل وقال جالى ولد

وعدا بقا ايااااااااااااااااااااااااااااااااااااااام كتير وكبرت كبرت اووووووووووووووووووووووى
اسمحولى ابعبر قصدى اعبر عن احساسى فى اليوم ده بيبقى اية وانهارده يا جماعة استثناء
باكتب عشان عيد ميلادى بقا وكل سنة وأنا طيب ويارب السنة دى تبقى أسعد وكفاية بقا كأبة

انهارده يوم غير كل ايامى

يوم اتعودت اعيش وياه احزانى

وافكر وارجع بالوقت ايام وليالى

والاقى جرح وحزن ودموع بتملانى

انهارده المفروض جميل وغصب عنى

باكتب كلام مليان اهات بتشكى احزانى

ليل طويل وسنين كتير مليانه

مليانه وهم وحاجات كتير ملخبطه كيانى

انهارده يوم غريب دايما يعدى

انهارده هو يوم احزانى يوم ميلادى

الأوله بسمله

جه جواب التنسيق بيقول انى دخلت كلية الطب ياحلاوة يا ولاد هابقى دكتور .

ومن يوميها واللى يقولى يا دكتور واللى يقول يا دوك والحمدلله محدش قالى يا دوج ولا يادك.. طور.

طبعا قبل الكلية قالك فى كشف طبى كشف طبى مين ليه داخل الجهادية يييييييييييييه قصدى الحربية ده انا قديم اوى .

قولت وماله نروح نكشف اهو نطمن عالصحة اللى مش موجوده اصلا واهى 20 جنية هندفعها ونعرف اية اللى عندنا ونتعالج لو فيه حاجة .... قشطة .

وروحت ياخويا ودخلت لقيت دكتوره زي الفل لابسه بالطو ابيض وماسكه سماعه....
اكشف صدرك... كشفت حطت السماعه وشالتها اتفضل روح ..... نعم أروح جاى من بيتنا عشان كدا يا نهار اية الجمال ده ؟ طيب ماشى حاضر هنروح شكرا .

وهكذا بدءت الكلية بخدعة الكشف الطبى ادفع كيف تكشف, فدفعنا ...... واتكشفوا هما,
ييييييييييييييه اهو بقا هنبدء نعك ونغلط فيهم, بلاش بلاش خلينا جنب الحيطة , صح كدا؟.

المهم انى طلعت سليم معنديش امراض طيب مش كانوا يحللولى انا باحب التحاليل اوى....

التحاليل الطبية مش الرياضية ما تفهمونيش غلط هما صحيح الاتنين هنا زى بعض غلط فى

غلط بس مش مهم اهو حاجة بتسلينا والسلام,

والسلام احسن من الحرب ,والحرب مش وراها غير الخراب ,والخراب بيجى من عدم الالتزام, والالتزام مش موجود عندنا, وعندنا كل حاجة تمام, تمام يا فندم المذنب فى الحبس, والحبس مش للمذنبين, والمذنبين احرار ,والاحرار مش عايشين, والعايشين مش لاقين اكل, والأكل عايز أرض, والآرض اتبنت مبانى, والمبانى بتقع على دماغنا, ودماغنا مليانه حاجات مش فاهمينها, وان فهمناها مش بنقدر نعملها ,وان عملناها مش بنكملها, وان كملناها بنموت بعدها

,هو فى اية اللى أنا باقوله ,

خلينا فى التحاليل الرياضيه اهو بتحس برضوة انك مش بتتفرج عالماتش وبس لا بتفهم بيحصل اية .قال يعنى خلاص لما الحكم يدى انذار لازم يشرحولنا ليه اده اللعيب ده انذار وهما اصلا عايزين الطرد من كل البرامج .

,خلينا فى الملوخيه احسن ,

الملوخية اكله جميله ممكن تاكلها ممكن تشربها لو عايز ولو مش بتحبها ممكن تشربها للى جنبك ,زى الملفات الكتير فى الشغل لما تديها لواحد بيحب يشتغل وتروح انت ما انت معزور وراك شغل تانى ,مش ده الموضوع اللى كنت باتكلم عليه ,

ياااااااااااه دايما بانسى يا جماعة قولت فكرونى انا نساى , أقصد الكلية , كلية اية ؟ كلية الطب يا جدعاااااااااااااااااااااااااااااااااااااااااااااااان.

..............

عبده

ياترى مين عبده ده ؟ هاقولكم استنوا .
فى يوم قبل الكلية باكلم واحد صاحبى مامته ردت عليا فى التليفون طبعا

ازيك يا طنط؟ الحمد لله ازيك انت يا عبده .مين عبده ده انا مش اسمى عبده ده طبعا انا باتسائل سرا .
تقريبا يمكن فاكرانى البواب بس.... لالا احنا فى منطقه مش فيها بوابين طيب يمكن عبده السفرجى برضوة لا ......معندهمش الله امال مين عبده ده .ايوة يا طنط احمد موجود ؟ لا مش موجود يا عبده. برضوة عبده طيب امرى لله عبده عبده

الصراحه انا خوفت اسألها لتقولى شفيق ياراجل بس برضوة مين شفيق لا لالالالالالا هاتجننننننننننننننننننن

المهم انى قفلت وبقى شكرا اسمى عبده وهذا اصبح اسمى عنوة ودون ارادتى وبقيت انا عبده وعبده انا ولكن لازلت لا أعرف هل انا السوفرجى ولا الطباخ وليه اصلا بقيت عبده

البداية

زى أى أم لما بتفرح بابنها اكيد امى فرحت والناس قالوا يابختها دى جابت ولد ياسعدها
واكيد امها زغرطتلها وابويا بقا هلل وقال ياجدعااااااااااااااااااااااااان جالى ولد.

ولما كبرت شوية بدءوا الناس حواليا ياترى ياكتكوت نفسك تطلع اية طبعا قولتلهم ظبوط
(قصدى ظابط يعنى) معلش كنت لسه صغير .
وبعدين لما كبرت شوية من جوايا اتغيرت .....بصيت حواليا نفسى اطلع اية
تخيلوا ...........
منادى على ميكروباص غريبة شوية بس اهى احلام طفولية .

ولما بدءت اكبر حبه بحبه لقيت جوايا امنية نفسى اكون دكتور والبس بالطو ابيض
والناس فى مستشفى بتقول يا دكتور يادكتور وهكذا .......
لا وماكنتش مهتم يعنى لا بازاكر ولا الكلام ده .

اااااااااااااااااااااااه نسيت اصلى عايش فى بيت جدى من و أنا عندى سنة يمكن أكتر شوية
الله يرحمه مات وانا فى الإعدادية كنت فى تالته اعدادى .فترة شقاوة ويمكن صياعة شوية.
ولما نجحت بقا ودخلت الثانوية العامية (قصدى العامة) أنا دايما كدا بانسى حطوا املهم عليا
وكل اللى كان نفسه يطلع حاجة ومش طلعها عايزنى اطلعها .....
...... الله ..... الله ..... طيب ماتجبيولى سلم اطلع لكل واحد شوية بس سبونى اطلع نفسى الأول وصدوقنى انا مش هاتحول .

جيت بقا قال اية جبت مجموع عالى فى سنة تانية بس ولقيت الناس كلها بتكلمنى حتى العيلة .... العيلة !!!!!!!!!! لآ لآ لآ لآ لآ دى حاجة غريبة عليا أنا مش مصدق (بركاتك يا ثانوية)
والكل بدء يسأل من تانى نفسك تطلع اية (الصراحة كان نفسى اعمل زى الحرامية والم فلوس كتير)قولتلهم طبعا دكتور فرحوا قالوا يا حلاوة فى العيلة هيبقى دكتور وقروا عليا .
وعلى رأى المثل ياناس شر كفاية قر ...............
رقدت بقا فى السرير أيام وأيام ولا حد سأل عليا (معلش يابنى هى دى الدنيا )
ده طبعا أنا باصبر نفسى .

وعدت كمان سنة تالتة وياحلولى يا حلولى دخلت الكلية كلية اية يابنى
ههههههههههههههههههه كلية الطب يا جدعاااااااااااااااااااااااااااااااااااااان.

بسم الله الرحمن الرحيم

تعالوا سوى نبتدى والله اعلم امتى هنتنهى على فكرة دى حكاية يمكن فيها حاجات شبه حكاية ناس كتير وفيها حاجات بتاعتى وبس يعنى اكيد مش كل الناس مرت بيها بس شبه حاجات مروا عليها