Tuesday, April 29, 2008

أول تاج

ده تاج جانى من سنووايت
اذكر عشر اشياء عن نفسك
حاضر يا دكتورة

1- مسلم , مصرى , طبيب قريب ان شاء الله ادعولى ....... قولوا امين

2- باحب الشعر جدا جدا جدا جدا وباعشق كتابته وانا باكتبه باحس انى موجود باكتب من وانا صغير كان عندى 13 سنة , باكتب اغانى برضوة بس لمجرد الكتابة مش اكتر يعنى مش بابيع لدرجة انى ساعات بامشى فى الشارع الناس كلها بتبص عليا وتقريبا بيقولوا اية المجنون ده لا ده اكيد مش تقريبا


3- حزين بدرجة كبيرة ووحيد جدا حتى فى وسط اللمة والناس باحس بالوحدة وفى عز الفرحة باحس بالحزن وان فرحتى مش كاملة , مش عارف ليه الحقيقة ممكن بقيت عقدة عندى موضوع الوحدة والحزن ده بسبب نشأتى , الله اعلم


4- باحب اللمة اوى وباحب الضحك والهزار جدا وباعشق الجو ده برغم الحزن والوحدة اللى باحسهم


5- بيقولوا عنى ناس يعرفونى انى مغرور او بمصطلح اخر تنك بس انا مش كدا هما بيقولوا ده لمجرد انى معتز بشخصيتى ومبسوط بيها لانى انا اللى كونتها وعلمتها بفضل ربنا


6- باتعارف على الناس بسهولة جدا مهما كانت صفاتهم الشخصية و عشان كدا ليا اصحاب ومعارف كتير اوى لدرجة انى ليا اصحاب اكبر منى سنا بكتير وبيعتبرونى صديق مقرب وبياخدوا ارائى وبيعملوا بيها , وليا عمى صاحبى جدا وبرضوة بيعاملنى من المنطلق ده


7- بيقولوا انى علمت نفسى بنفسى زى ماقولت وده بيخلى شخصيتى مش متأثرة باللى حواليا عشان كدا بيستغربوا ازاى انا ابن البيت ده وانا نفسى اشهد بده انى شخصية مختلفه عنهم مفياش منهم غير طيبتهم


8- باحب اساعد الناس طالما فى مقدورى كدا وبازعل اوى اوى لما باحس ان حد مش مقدرنى بعد اللى باعمله ليه وحصلت كتير معايا بس عمرى ما ندمت الحمدلله على مساعدة حد بجد بابقى مبسوط اوى وانا باساعد حد اعرفه باى شىء اقدر اعمله


9- باحب التدريس جدا جدا وكانوا زمان بيقولوا انى هاكون مدرس والحقيقة اديت دروس كتير اوى بس مجانا لمراحل متفرقة ولمواد عمرى ما درستها اخر حاجة كان انجليزى لحد محتاجة انى اساعده فى الثانوية العامة وكان سبب سقوطه كذا مرة , بالاقى نفسى اوى فى التدريس واتمنيت لو اكون طبيب مدرس او مدرس طبيب بس ده مش هيحصل , نصيب الحمد لله


10- اخيرا وليس اخرا مبسوط بالناس اللى بدأت اعرفهم من التدوين ورغم الفترة القصيرة الا ان العالم التدوينى اضافلى حاجات يمكن مش كتير بس اضاف وكفاية معرفة الناس زى سنووايت ورودى واجدع بنوتة وصحفية روشة وساعد نسرين وناس كتير





التاج هابعته خمسة لمين امممممممممممممممممممم صعبة شوية طيب
ساعد نسرين الأيمن
بنوتة مصرية (رودى)
مستجدة ( ربنا يرجعها عشان طولت الغيبة )
وائل (ليه أصحاب بجد)
محمود نميس ( الشارد)

جارى تنفيذ الطلب باخبارهم ومش باعته للى باعتهولى




بلغ اللى بعتهولك بانك نزلته
يا سنوو ياسنووايت انا نزلت التاج يادكتورة يادكتورة التاج اهو



واخيرا فى حاجة غريبة اوى حصلت كذا مرة ليه كتير فاكرنى بنت يمكن عشان اسم wanna الله اعلم بس ياجماعة انا رااااااااجل

وكمان موضوع السماعة عشان خاطر سنووايت

يادكتورة لسببين هى مضيقانى وحاسس بعدم وجودها

الاول لان التعليم عندنا مش عاجبنى جدا وحاسس انى دكتور وناقصه سماعته يعنى انا اللى المفروض ادور عليها واستخدمها ازاى

محدش بيعلمنى الا من رحم ربى

والتانى ان باشوف الدكاترة بيستخدموا السماعة ساعات فى حالات مش محتاجه

لمجرد انهم يدوا انطباع للناس انهم كشفوا عليهم بس

تحياتى
سلالالالالالالالالالالالالالالالالالالالالالالالالالالالالالالالالالالالالالالالام

14 comments:

Anonymous said...

اول تعليق

لولولولىىىىىىىىىىىىىىىىىىىىىىى


مش مهم الاوله في ايه بس اكيد مامتي هتفرح اووي اني طلعت الاوله اهو تعويضا علي اللي مقدرتش اوصلة في المدرسه هههههههههههههه


جايالك تاني

Anonymous said...

يلهووووووووووووي وتاني تعليق كمان


ههههههههههههههههههه

Anonymous said...

والتالته كمان اهوو شوفت تفوقي تفوقت عنك علي فكرة يعني احضر بقي درسات عليا علطول هههههههههه

بجد ميرسي علي التاج واوعدك هرد عليه قريبا

تاج جميل وسهل خالص اجابتك عن نفسك صدقني وانا بشوفها اكنك بتتكلم عني

يعني الاشعار والحزن والوحده والكلام ده كله كنت بحسب بتتكلم عني

مش دائما اللي بيضحك وبيضحك الناس يكون فرحان ومبسوط

ربنا يوفقك وليك عندنا يا دوك لما ربنا يوفقك هنلم من بعضينا هنا ونجيبلك السماعه هههههههههههه

بس شد حيلك انت بس

تحياتي لك
رودي

Anonymous said...

كنت برضه فاكر مدونتك مدونة بنوتة
بس طبعا عرفت على طول اول مادخلت
المهم
اجاباتك على التاج لذيذة اوى
طبعا احساسك بالوحدة حتى لو فى وسط الناس ده لانك شاعر
بس بالرغم من كدة عاجبنى انك اجتماعى
كما تقول
ربنا يوفقك
وتحقق احلامك
تحياتى ليك

Anonymous said...

أول مرة اعرف موضوع انهم بيفتكروا المدونة لبنت والسبب بسيط انك كاتب طبيب بلا سماعة

والحمدلله اني عرفت اخيرا ليه بلا سماعة والحقيقة انا كنت متوقعة انها السبب الأول لان فعلا عندك حق
احنا في النظري كويسين اوي لكن المهارات الاكلينيكية ناقصين سماعات وغيرها كتير

شكرا علي قبولك التاج واجابته وان شاء الله ربنا يكمل لك فرحتك وتحس بيها كاملة دايما

Anonymous said...

كلها صفات ولا اجمل ..ماشاء الله..ربنا يحميك..و يخليك اعظم دكتور فى مصر يارب ..بس اتقى الله فى شغلك و ماتزعلشى منى..اصل فيه دكاتره ..مش بيحترموا المهنه....
اما بالنسبه للتدريس الولد بسبب مساعدتك له سقط كذا مره!!!هههههههههههه ياحول الله طيب سيبه السنه ديه من غير ماتدرسله يمكن ينجح ههههههههه...انا بضحك معاك .......وربنا يكفيك شر دنيا التدوين...انا زيك مابقاليش كتير ..بس اللى شفته يا دكتور يخلينى اعمل عندك ابونيه...........الا صحيح انت دكتور ايه ...لالنصيبه تطلع دكتور بيطرى
برستيجك اتهز يامفروسه و سط البلوجريه اصحابك ههههههه سلام ربنا يحققلك احلامك

Anonymous said...

الله يسامحك يادكتور انا عملت فيك ايه بس

Anonymous said...

يارب يوفقك وينجحك ويحميك ويبعد عنك شر الحاقدين الحاسدين قولوا امييييييين
أنت بجد شعرك جميييييل اوى يادكتور يكفى ان واحده عسل زيي ماكنتش بتحب الشعر بقت تحبه
بس اللى مزعلنى انك حزين ووحيد حد يكون عنده الموهبه الجميله دى ويفضل يحس بالحزن او يكون عنده كل الناس اللى بتحبه دى ويفضل حاسس بالوحده كلنا بنحبك ومعاك يااجمل دكتور
بس نصيحتى ليك لو حسيت ان فيك شئ من الغرور حاول تقضى عليه ولو عندك افكار غير صحيحه حاول تصححها لان مش دايما اللى بتعلمه الانسان يبقا صحيح ,فحاول تحافظ على المياه النقية من اى شئ يصيبها , وحاول تبحث عن اللى يسعدك ويفرحك لان دوامه الحزن نهايتها صعبة
ودعوتى ليك ان ربنا يرضى عنك دنيا واخره وينعم عليك بالطمأنينة

Anonymous said...

بغض النظر إنى شايفة إن التاج دا من أصعب ما يمكن عشان فيه بتتكلم عن نفسك ودا صعب فى حد ذاته

لكن حضرتك كنت موفق فيه

بالنسبة لنقطة السماعة
عجبتنى جدا جدا

تشبيه بإسقاط رائع
دمت موفقا

Anonymous said...

يا اجاباتك الجامده يا دكتور

مبروك عالتاج وكل تاج وانت بخير ان شاء الله

تحياتي

Anonymous said...

تعرف يا دكتور
أجاباتك جميله قوي

بتحسسني في حاجات كتير بشخص عايشته في يوم من الايام وبالتأكيد لسه مأثر جوايا

تعرف ان زي ما قال واحد فيلسوف مش فاكر أسمه الراجل ده كان بيقول الجحيم هو الاخرون

يعني مفيش أحسن من الوحده

تعرف أن أصعب حاجه أنك تتكلم عن نفسك برغم البساطه الموجوده في التاج ده بس ده تاج صعب جدا

ألف شكر علي التاج يا دكتور
أول تاج ليه
:)

أن شاء الله البوست اللي جاي أجاوبه

خالص تحياتي

Anonymous said...

شخصيتك جميلة يا دكتور واكثر ما يميزها رقم 5
ربنا يوفقك

Anonymous said...

بنوتة مصرية

يارب دايما الاوله كدا بس كدا برضوة تلعبى فى المدونة بتاعتى ماشى هههههههههههه
هاستنى التاج بتاعك وياستى اعتبرى السماعة وصلت متشكر




مدحت محمد

مدونة بنوتة اية حكاية بنوتة دى لا دى مدونة رجالى شكرا لمرورك
تحياتى





سنووايت

شوفتى طبيب بلا سماعة وبرضوة بنت ؟
عرفتى موضوع السماعة اهو تحت امرك يا دكتورة بالتوفيق ان شاء الله





واحدة مفروسة

ماتخافيش ان شاء الله هاراعى ضميرى
كنت هابعتلك التاج لقيتك جاوبتيه
لا هو ماكنش ولد كان بنت والحمدلله نجحت لما زاكرتلها يعنى العكس صحيح ههههههههههههههه
تحياتى





wael

وانا مش عملتلك حاجة





غير معرف

متشكر جدا وان شاء الله مش هاحس بالحزن والوحدة طول ما حبايبى حواليا
تحياتى





فزلوكة

هو فعلا صعب جدا تتكلمى عن نفسك
شكرا لمرورك وبالتوفيق يارب





dr_modymodak

تسلم يا باشا لما نشوف اجاباتك بقا
تحياتى





alshared

ناس كتير متشابهه بس اكيد انا مش هو
ولما تجاوب بقا تاجك ونشوف المستخبى هههههههههههههههههه





desert cat

مش جميل اوى يعنى يا قطة اكيد فيا عيوب وكتير كمان
تحياتى

Anonymous said...

تصدق انك فيك حاجات كتير قوي مني
بجد والله
يعني جزءية انك حاسس بالوحده وسط اللمه وبتحب الضحك والهزار
اضافة الى حبك للتدريس .. انا كنت بادي دروس برضه للناس اللي عايزين يدخلو كليات فنون في الثانوي

اه صحيح
انا كنت عارف انك مش بنت وراجل وده بيبان من تعليقاتك عند الناس اصلا
ده غير ان البروفيل بتاعك مكتوب فيه انك
MALE
وسيد الميلات كمان يا دكتره




سلاموووووووووووز