ليه الدكتور نسى الفوطة ؟؟؟
نسي الفوطه
وناس واقفه بتتريأ ومبسوطه
وناس تانيه بتستغرب ومنقوطه
ليه الدكتور نسي الفوطه
وهو يا عيني كان واقف ووشه أحمر ولا القوطه
و قال ياجــــــــماعه سامحوني
وقبل ما تيـــــــجوا تلوموني
تعالــــــوا أحكيلكوا أنا حكايتي
وبعديها إبقوا حـــــــاكموني
سنــــين فــــاتت في ثانــــــويه
كفاح دامي وعــرق ودموع
وبعد المعركـــــــــه الحــــاميه
قدرت أنجح وأجيب مجموع
أخيراً حلمنـــــــــــــــــا إتحقق
هخش الطــــــــب وأدّكــــتر
رســـــــــــاله جميله ومعـــاها
مقام عالي وفلوس أكـــــــتر
في أول يوم لـــــــــبست جديد
وشلت البالطو رحـت لاقيت
زمايلي إتحــشروا في مــدرج
عامل ولا عــــــلبة الكبريت
ولكــن برضه مايئستش
دخل دكتور قعد يشــــــــــرح
كلام كــــان صعب ولاتيني
و أنا متنـــح ومـــش فــــــاهم
لاقيت النــــــــوم غلب عيني
و لسّه أنا برضه مايئستش
و قلت مادام ضــــاع النظري
هظبّــــــــط نفسي في العملي
جريت عـ المشـــرحه بسرعه
لكن كالـــــــــعاده خاب أملي
دخلـــــت لاقـــيت 200واحد
بيتخــــــــانقم على الجــــــثه
وناس واقـــــــــفه من الزحمه
على كتافـي ومـــــــش حاسه
و لسّه أنا برضه مايئستش
و طبــــــعاً حسّوا بظــــروفنا
وحطّولنا إمتــــــحان فوازيــر
وكل أمّا آجي أحــل ســـــؤال
أقف أدامــــــه زي الــــــزير
و لسّه أنا برضه مايئستش
وجينا في لجنة الشـــــــــفوي
وكان أدّامي واد كـوسه
خد الفول مارك مـ الدكتور.
وخد فوقهـــــــم كــمان بوسه
و لسّه أنا برضه مايئستش
سنه بتمشــي وســــنه بتيجي
مقـــالـــب بعـــدها مقــــــالب
زمايلي إتعينوا و قبـــــــضوا
و أنا شايـــــل لـــــــقب طالب
و لسّه أنا برضه مايئستش
كبـــــــرنا شـــويه وقــــالولنا
خلاص دلوقتي شوفوا حالات
و رحنـــــــا نشوف وكالعاده
دا كله بيطلع إشتــــــــــغالات
و لسّه أنا برضه مايئستش
لحد ماخلصم السبــــــــــــعه
وقلت خلاص هروق وهعيش
و قبل ما أفوق من الصــدمه
خدوني عشان أخـــش الجيش
و لسّه أنا برضه مايئستش
وقعت هناك في إيــــد ظابط
ظغرلي وقال يا بســــــكوته
أحب أبـشرك إنــــك معــايا
هتطـــــــفح الـــــــــــكوته
و لسّه أنا برضه مايئستش
خلااااص السبعه بقوا عشرة
ولسه أنا ماشي جنــب الحيط
و بان السن علــــــــى وشي
و شعري إبيـــّض و إصلعيت
و لسّه أنا برضه مايئستش
وبعد ما قـــــلت كــــــــفاره
خلاص هرتاحلى بقى كام يوم
لاقيتهم تـــــــــانــي واخدنّي
عشان تكليـــــــــفي في السلوم
و لسّه أنا برضه مايئستش
و قلت هنـــاك هآخد قرشين
آكل منهم و أجيـــــــــب لبسي
فوجئـــــــت يا عيني بمرتب
مايقضــــــنيش حتى شيبسي
و لسّه أنا برضه مايئستش
و بعد الـــعمر دا كـــــــــــله
رمــــــوني في وحـــده صحية
نسيت الطب أنا فيـــــــــــها
وبقــــــــيت زي التمــــــرجيه
و لسّه أنا برضه مايئستش
و آديني بعيش وهعمل أيـه؟؟
ماليــــــــش ولا حول ولاقوة
وحيد غلبان وحتى مافـــيش
جـــــواز علـــى نفــــقة الدولة
و لسّه أنا برضه مايئستش
قام الدكتور صعب عـ الناس
و فــــــضلم يـــبكوا على حاله
و حتى الفوطة نســــــــيوها
ولموا فلــــــــــوس وسابوهاله
و قال دكتورنا عـ الفوطــــه
تعــــــالوا هشـــــيلها أنا بكرة
لكن اهل المريض قالــــــوا
خلاص
هنسيبها للذكرى
منقول
Falling hearts Here
13 comments:
المفروض يصاب باليأس بعد ما نسي الفوطة
بس كل اللي مر بيه ده بيثبت انه شخصية مصرية اصيلة شربت من مياة النيل العظيمة و اتعلمت الصبر في طبعته المصرية الأصيلة
تحياتي وشكري علي النص البديع
طب استنى اغسل وشى وأهو بالمرة انشف بالفوطه
الصبر مفتاح الفرج ويكفيه إنه هيشتغل أعظم مهنه فى الوجود
ههههههههه برضه مش عذر ليه تنسى الفوطه
بجد قلبى معى الدكاترة وفى النهايه 250 جنيه يالا معلش طيب وفر الفوطه وتمنها يا راجل
تصدق انا اتصدمت!!!!!!!!!!!!!!!!
والله اتصدمت لان كنت بحس ان طلبة الطب دول عالم في ملاكوت تاني اتاريهم يا عيني بيتعذبو من الثانويه العامه لاحد ميخلصو الجيش!!!!!!الفكره ديه الناس موصلهالنا من زمان ان طالب طب فو ستوي كل حاجه في الدنيا حياته عباره عن تفوق ونجاج وبس لكن الواقع اللي نقلتوهولنا ده الله يعينكو عليه يا رب.
أنا الحمد لله كنت متبعه نظرية صحتي بالدنيا مكونتش اتعب نفسي في مذاكره ولا كلام فارغ من ده والحمد لله دخلت الكليه اللي عايزاها كمان كرم من عند ربنا والله ههههههههههه
ربنا يعينكو والله موضوع مؤثر فعلا
ومتغبش كتير تاني يا دوك كده
تحياتي
قلبي معاكم
أنا أصحابي زي حالاتك كده في كلية طب
وياعيني بقعد أزل فيهم طبعا بهزار
:)
ربنا علي الظالم
ههههههههههه
جامد جدااا ...والله انا بقر على الطلبه اللى فى طب عين شمس وبالذات بتوع 4 يا دكتور دا واخدين الامتحان جااااهز ومش عاجب انما احنا نقعد شهر تطلع عينا تنفيذ وفى الاخر يا مرفوض يا مقبول
ومع هذا وتحت كل الظروف وعشان تنتخبنى وتبطل تحرض الشعب منى ليك واحد بلاى استيشن هديه وواحد سماعه وحعينك مساعد الجوهرى مسؤول الصحه....وطبعا فى عهدى كل طالب ان شاء الله ليه جثه هديه...
وانتظر منى قايمه الزواج فى عهد الرئيسه سومه..عشان تعرفوا العز اللى انتوا فيه
تحياتى ليك سومه_87
الدكتور نسى الفوطة علشان كل الاسباب الى ذكرتها دى يا دكتور
وبعد ما بيطلع عينه فى مذاكرة وسهر وخلافه وبيطلع عينه اكتر شغل فى المستشفى ونباطشيات وعمليات بياخد مرتب باهظ يكفيه ويكفى عيلته كلها 250 جنيه
ده ليه حق ينى الممرضة مش الفوطة
السلام عليكم
فوطه ومالوا
منا شفتهم بيرشوا بيرسول فى غرفه العمليات
و بعدين انا عندى بكره ان شاء الله روند أطفال اشتغاله يعنى
وفى النهايه 250 جنيه
معلش
احييك على امانة النشر
تعرف هو حاله يصعب على الناس عادى لانه منهم لكن مهما كان ده مش مبرر عشان ينسى الفوطة
اللي عاجبني فيه انه لم ييأس لحد دلوقتي
جيفارا
انا سربت من النيل ومصرى اصيل
بس زهقت وصبرى عدا حجم الفيل
تحياتى
الباحثة عن السعادة
اعظم مهنة اه بس لازم ناكل عشان نعيش ونقدر نؤديها
appy
هو مش عزر وعلى فكرة هو زيادة عندنا لكن بيحصل فى اى حته فى العالم فعلا وسبب زيادته عندنا ضيق الواحد بحياته كطبيب ممكن
فنانة مفروسة
ما تتصدميش اوى كدا هو الواقع دايما مؤلم والحمدلله انك دخلتى اللى عايزاه بس برضوة انا كمان الحمدلله عشان دخلت اللى عايزه
alshared
زل ياعم براحتك اما وريتك اقع تحت ايدى بس وانا افرجك هههههههههههههه
تحياتى وربنا عالظالم
somaa mahaba
موضوع الامتحان الجاهز اللى بتقولى عليه ده بيحصل ساعات بس عارفه بيبقى اصلا احنا لسه داخلين السنة ومحدش فاهم حاجة وكمان امتحان بكام درجة من 900 مجموع كلى
وبرضوة هاقلب عليكى الحكم مش انا اللى ترشيه وبالعب بلاى ستيشن عالكمبيوتر
قطة الصحراء
والله هو قريب هينساها وممكن ينسى نفسه جوه
ربنا المستعان
abo 7anf
لا تيأس ولا تقنط من رحمة الله
فربك الرزاق الوهاب
monalzia
اكيد محدش قال انه مبرر بس زى ما قولت فوق انه حقيقة فى العالم كله نتيجة سهو الانسان فكلنا بشر وكلنا خطاء
سنووايت
لن ييأس مهما حدث ولنا الله
:)
لا عادى مهو ممكن يسيبهم يطلعوا الفوطه وبعد كده يبروزها للذكرى...بدل ما تفضل جوه وميعرفش يشوفها تانى
لذيذه اوى....
تحياتى
ياريت بتيجي ع الفوطة بس
الواحد خلاص طهق
من كتر المواد وطريقة التدريس الغبية
ربنا يكون ف عونكم يادكاترة
بفكر نعمل رابطة مدوني الطب ايه رايكم؟
Post a Comment