Tuesday, June 10, 2008

يالهوى على اللى بيحصل


محدش يفتكر ان دى الأغنية الغريبة بتاعت يالهوى دى نو نو نو
مع ان الموضوع ملوش علاقة بالهزار الا انى مش باحب الكأبة فى الحاجات دى
او يمكن انا خلاص بقيت جبله ومش باحس
المهم ان حصلت حاجة عجيبة انهارده هى مش اول مرة تحصل فى المجتمع اليومين دول
لالالالالالالالالالالالالالالالالالالالالالالالالالالا
دى بتحصل بقالها فترة
اقولكم اية اللى حصل
نازل الصبح فى امان الله رايح المستشفى المهم قال اية مستعجل بقا ومتأخر والكلام ده
وماشى بامد اقوم ابص الاقى واحد جاى فى وشى لابس بدله وحاطط نظارة شمس فوق راسه الحركة دى بتضايقنى على فكرة
المهم
الشخص ده يعرفنى واعرفه من ايام الثانوى العام مش لانى كنت التانى على المدرسة وكدا لالالالا
لانه كان معايا فى المدرسة وكمان الفصل وكمان أحياء زيى
وكمان ساكن جنبى فى المنطقة يعنى ما تعدوش طرق المعرفة المهم
هو جاى فى وشى وانا مستعد للابتسام بقا والكلام اياه ده بتاع الناس اللى يعرفوا بعض
حتى وان كنت مش باقبله بس ده الاصول يعنى المهم
بابص لقيته عامل عبيط اه والله عامل عبيط
بص بجنب عينه كدا قال يشوفنى شوفته ولا لآ وبعدين بص قدامه
وبعدين بصلى تانى بجنب عينه
قال يعنى انا مش شايفه البعيد
يمكن النظارة اللى فوق راسه مغيمه عليه ولا حاجة روحت مكمل طريقى
هو طبعا افتكر انه لابس بدلة والكلام ده يبقى واد ما يعبرش امثالى
بس لا طبعا احب اقوله ان هو بتاع بيطرى اولا
وثانيا بقا مندوب مبيعات يعنى عادى
مش عشان الشركة اديتلوه بدلة يعمل فيها واحد
يابنى عندى بدل انضف بمراحل من اللى انت لابسها لو على البدل يعنى
احب انوه انه مش يفرق معايا
بس بجد اتفقعت مرارتى من الناس والمجتمع واللى وصلناله
الناس بقيت كلها تشوف بعض اللى يعمل عبيط واللى يعمل اهبل
واللى يعمل كفيف زى ما يكون خلاص الواحد لو حد شافه هيمسكه بقا ويقوله اكلنى مثلا
ولا دى جنية اركب زى الناس اللى ماليين الشوارع دول
بس الصراحة انا لو وقفته هاقوله تاخد علبة السجاير دى تشتريها منى عشان انا عايز اروح ومش معايا فلوس اركب
مش هما بيعملوا كدا برضوة حتى لو انت مش بتشرب سجاير اهو تاخده تجامل جيرانك ولا حاجة
بجد حاجة تقرف اسلوب المعاملة اللى بقا موجود
فانا اتحرق دمى من الموقف مش لانه معايا لا لانه فكرنى باللى بقيت اشوفه اليومين دول
قصدى السنين دول
من معاملة غريبة بين الناس وعدم احترام للغير وحقد شديد
الناس نسيت ان فى حاجة اسمها مودة وحب نسيت ان فى عشرة واخوة
نسيت ان فى حق جار وحق سائل
نسيت ان فى حق كبير وحق للصغير
نسيت حتى اداب الطريق اللى كانوا بيعلموها زمان فى المدارس
ومابقاش حتى فى مدارس
بقيت مجرد مكان المدرسين تروح فيه عشان تجيب عيال للدروس الخصوصية
وعيال رايحه تاخده شهادة وبس
وبس كفاية كدا احسن تعبت نفسيا وجسمانيا وهاروح اشوفلى دكتور
سلالالالالالالالالالالالالالالالالالالالالالالالالالالالالالالالالالام

53 comments:

يوميات فنانه مفروسه جداا said...

اول تعليييييق هيييييه هيييييييييه
وبعدين جراه ايه يادكتور ازاي يعني عايزلك دكتور يعني اما انت بتلعب ولا ايه وبعدين وماله يعني دا مندوب مابيعات اد الدنيا وتلاقيه يعني فرحان بالبدله شويتين ايه المشكله وبعدين برضو اخص عليك اخص مش تديله برستيجو كده وتروح انت برضو تسلم عليه لا لا لا ليه كده
معلش اصلي بتفقع واتفرس اوي من النوعيات اللي زي ديه بس انا باه بفرسهم اكتر وامشي من قدامهم ومره واحده عملت معايا الحركه ديه مشيت من قدامها فاتكسفت فجت تسلم عملت نفسي مش فاكرها وبعدين قولتلها اه ومفتكرتش اسمها بالعند بقي مفيش حد احسن من حد
بلا وكسه كل واحد يلبسله كشاف يفتكر مفيش كشفات علي دماغ حد غيره ههههههههههه
معلش طولت عليك وسبتلك شويه بودره سحريه عندي في البلوج عند دباديبو
وحبه صوغيرين مش بكترها خالص مش يعني ابو بلاش كتر منه هههههههههههه
سلام

wanna b a physician said...

الاولى دايما يارب
والله يا بنتى انا عادى خالص اسلم على اى بنى ادم لقيته فجأة كدا بيعمل عبيط طيب وماله انا اعبط منك
حلو موضوع الكشافات ده زى ما يكون كلنا شغالين انقاذ بقا هههههههههههههههههه
انا جيت اخدتها بس على فكرة طلعت بودرة مضروبة
وانتى تطولى براحتك

يافنانه

د/ داليا said...

< السلام عليكم ورحمة الله وبركاته > .....بجد انت عندك حق فى كل اللى قلته..... ده لو كان له مصلحة معاك , كان قابلك بالاحضان و السلامات ,لكن يعطل نفسه ليه .....هو الزمن ده كده , لو حد ابتسم فى وشك يبقى عاوز حاجة , لو حد كلف خاطره و رفع سماعة التليفون يسال عليك , لازم يكون اخر المكالمة طلب ؟! ..... ده بقى زمن المصلحة !!.....تحياتى ليك .....سلام

مدحت محمد said...

يالهوى ع اللى بيحصل فعلا


بس انت اللى ميغبركش متعبروش ياعم

د/أبويحيى وادم said...

السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

حلم الحرية said...

معلش يا دكتور
خليك انت الكبيير

هوه واضح انها قربت تتحول لظاهرة ان المجتمع يفقد بالتدريج اهم اللي كان بيميزه
يفقد ترابطه وحميميته
جزيئات الود والحب اللي كانت مالية فراغ الجو حوالينا بدات تقل
وبدالها نلاقي جمود في العلاقات الانسانية ولا مبالاة
هاقول ايه بس
ربنا يرحمنا برحمته

سعيدة بزيارتي لمدونتك
تحياتي

رحاله said...

بسم الله
السلام عليكم ورحمه الله
والله عندك حق
ومش بتحصل ليك بس الحكايه دي
دي لاغلب الناس
انا ببقه ماشيه فى الكليه ومعايا اصحابي الى من البلاد التانيه وبيعاملونى بمنتهي الزوق والاحترام ولو شافونى يوقفونى ويكلمونى
والى من عندنا ييييييييييييييه ولا يعرفوك يالهوى
بس الواحد الصراحه مطنش يعنى مش بحط في دماغي
تحياتى

Soooo said...

هههههههههههههههههه

ايوه قول انك حاقد عشان هو لابس نضاره سمس من المضربين بتوع العتبه وانت دكتور ومش معاك حتى سماعه
احقد احقد

بص يادكتره
لظروف خاصه .. حصل اني اتعرفت على مجموعه من خريجين كلية صيدله باحدى الجامعات الخاصه
وكنت من اول ماعرفتهم وانا كارفهم كرفه رهيبه
مش حقد ولا حاجه والله
بس عشان انا فعلا ماحبش اللي يتنطط علي وكل مايتصل بي في البيت وقت مانا ماكانش معايا موبيل .. يتنطط ويقول لامي الله يرحمها او لابويا .. انا الدكتور فلان
وهو اصلا اصلا لسه في سنه تانيه
وغير كده اصلا اصلا انا جبت مجموع اكبر منو بكتير

المهم
تدور الايام والشله دي كلها تشتغل مندوبين مبيعات
وطبعا تنطيط بالبلده والنضاره وعربية الشركه وحاجه ايه

لكن انا اللي يتنطط علي اعرف اوقفه عند حده
وحصل مواقف كتير زي الموقف اللي حصل معاك

وفي يوم من ذات الايامات .. جالي واحد منهم وهو بيتمحلسلي وعايزني اوضبلو الشقه بتاعته باعتبار اني مهندس ديكور

طبعا عملتله الشغل عادي .. بس بعد ماوضحتلو انه عادي
ومش عشان دكتور يبقى احسن واحد في الدنيا
الكون محتاج توازن
لازم يكون في محامي ولازم يكون في مهندس ولازم يكون ولازم يكون ولازم يكون
ساعتها بس هو استوعب قصدي

انا عارف اني شطحت بتعليقي عن الفكره الاساسيه واللي هي فين الموده اللي مابين الناس
لكن لو بتسأل على الموده والمحبه مابين الناس .. اقولك ان الانسان الضعيف هو اللي بيكره غيره
بينما الانسان القوي هو اللي يعرف يحب الناس في زمننا ده

وربنا يحبب فيك خلقه يادكتره



سلاموووووووووز

~*§¦§ Appy §¦§*~ said...

يا نهار اسم الله عليك فيه ايه بس اهدى يا عمنا هو فين ده وانا اضربه
الا قولى مش انت برضه بتقول كنت نازل الصبح يعنى يعنى يعنى فيه شمس طيب هو لابس النظاره فوق علشان دماغه اه صح طيب سيبنى انا بقى عليه انا هموته
المهم دى نفسيات تعبانه يا دكتور
ثانيا حب الناس موجود وبينهم وبين بعض والدنيا بخير صدقنى

wanna b a physician said...

مدحت محمد

ماهو انا ما عبرتوش يا باشا
بس انا شايف ده فى المجتمع انتشر
تحياتى

wanna b a physician said...

د\ داليا

والله هو مش كل الناس بقت لمصلحتها وبس
بس الموضوع زاد عن حده وبقيت زى ما تقولى كدا عادة
ربنا يرحمنا برحمته

wanna b a physician said...

د/أبويحيى وادم

اهلا بيك وتطول براحتك
بس هو الموضوع مش محتاج حملة لان فى ناس كتير لو كلمتهم باللغة العربية الفصحة مش هيفهموا لانهم بيتكلموا عامية ومش اتعلموا للدرجة دى وفى ناس اتعلمت وبرضوة مش يعرفوا اللغة الفصحة
ولو كلمت مجتمعنا بالفصحة وبس هيقول بتتنطط عليهم والحاجات دى
بس اللى اقدر اقوله دعوة لعدم استخدام الفاظ مسفه
تحياتى ليك ولحملتك يا دكتور

wanna b a physician said...

حلم الحرية

جزيئات الود والحب اللي كانت مالية فراغ الجو حوالينا

حلو التعبير ده بس ده لسه موجود مش معنى اللى بيحصل انه اختفى
قال صلى الله عليه وسلم الخير فى وفى امتى الى يوم الدين

انا اسعد بزيارتك يافندم

wanna b a physician said...

رحاله

وانا زيك والله مش باحط فى دماغى ولا حتى فى رجلى ههههههههه
اصل انا بس لقيتها انتشرت قولت اقول بقا وابعبع
تحياتى

wanna b a physician said...

Soooo

بص يا باشا مش مشكلة فقير وغنى مشكلة الحقد اللى بقا دفين جوا الناس مش بس على فقر وغنى لالا دى بقيت فى كل حاجة
تلاقى واحد يحقد على جاره لان ابنه فى مدرسة احلى من اللى فيها ابنه
يحقد عليه لانه جاب مجموع اكبر من ابنه وهكذا
يعنى هى بقيت ظاهرة العصر
تحياتى يا باشا

wanna b a physician said...

اببى


اه شوفتى الصبح وحاططها فوق
يمكن عاملها تانده هههههههههههههه بس ياترى قبنورى ولا اى كلام
وعلى فكرة انا هادى جدا بقا اهو حتى شوفى الهدوء
وانا مصدقك طبعا ان الدنيا لسه بخير
تحياتى يا فندم ويعيش كوكبك المصون

.:.-=- ELGaZaLy-=-.:. said...

نسيت ان فى حق جار وحق سائل
نسيت ان فى حق كبير وحق للصغير
نسيت حتى اداب الطريق اللى كانوا بيعلموها زمان فى المدارس
ومابقاش حتى فى مدارس
بقيت مجرد مكان المدرسين تروح فيه عشان تجيب عيال للدروس الخصوصية
-------------------

صديقى الطببيب كيف حالك...

سيدى نحن فى زمن بلا اى قيم نحن فى زمن نقتل فية ضميرنا فقط من اجل ان نستمر فيما يدعى باكل العيش...

عارف كان ليا اصحاب زمان طوال عمرهم بيفخرو بانى صديق وكدة...لما ربيت دقنى وربنا بعدنى عن شوية غلطات...بدائو يخافو يسلمو عليا علشان مقولش لحد فيهم نروح الجامع...انا اتعودت اعمل حاجة ظريفة جداا

ابتسم فى وش الى بيقابلنى سلم عليا مفيش مشاكل مسلمش ...]بقى انا خدت الثواب..

Desert cat said...

يالهوى يا دكتور
انا لو منك اروح اقرب منه وكانى رايحه اسلم عليه ده طبعا بعد ما اكون سبحت الابتسامة بتاعتى واول ما اقرب منه امشى فى طر يقى ولا اعبره
الناس دى محدثين نعمه
لا بس بدلة ولا جزمة افتكر ان كل الناس حافيه زيه لما كان ايام زمان
ربنا يهدى النفوس

سنووايت said...

البدل بتعمل اكتر من كدا
:)

هو دا بقي اسلوب التعامل المعترف بيه بين الناس , الحاات اللي بتتكلم عنها من مودة وحب وعشرة والحاجات دي اتلغت من قاموس حياتنا اليومي , واللي بيعملهم بقي هو اللي غريب
ربنا يهدينا وينقذنا من اللي احنا وصلناله

سومه...مجنونه فى بلد عاقل said...

ههههههه بص هو مش موضوع بيطرى ولا بشرى هو الموضوع ممكن يكون سباك...ويبصلك من تحت لتحت...دا اذا عمل انه يعرفك
عقبال ما تتعين كدا وتجيب عربيه وسماعه
انا عاوزه افهم هم ليه فى مدونين كتيييييير دكاتره هو الكبت مركز عندكم ولا ايه
الحمد لله انى مدخلتش طب ...ولا انا اصلا مجنونه والشعره اللى باقيالى كانت حتطير
تحياتى ليك سومه_87

سومه...مجنونه فى بلد عاقل said...

اه اسمها والا مش ولا ...فى حرف اختفى فى الكتابه

alshared said...

أيه يا دكتور
الموضوع ده بقي هوه العادي وأي حاجه غيره هيا اللي مش عاديه
يعني لما تشوف واحد بيسلم علي حد في الشارع ده يبقي مش طبيعي
لسنا في زمن الاخلاق
بل في زمن المظاهر
والمصلحه هي الغالبه علي الجميع

نفض يا سيدي
علشان المجتمع كله عايز يتصلح

تحيـــــــــــــــاتي

أيمن بدر said...

ده صحيح يا دكتور تبقى ماشى ومبتصدق تشوف حد ليك معاه ولو ذكريات قليلة وتلاقيه ولا كأنه شافك حاجة تفقع فعلا
ولو على الدكتور عالج نفسك احسن اصل الواحد ميضمنش
سلام

wanna b a physician said...

ELGaZaLy

هو فى ناس والله لسه جواه القيم والاخلاق
بس الواحد زهق وربنا يكرمك دايما وتاخد ثواب اكتر واكتر
تحياتى ليك

wanna b a physician said...

desert cat

والله يا قطة انا مش باقبله اصلا بس قولت السلام بتاع ربنا ولو جه سلم هاسلم بس تقولى اية بقا للبشر
ربنا يرحمنا
تحياتى

wanna b a physician said...

سنووايت

لا يا سنو لو على البدل ما البدل كتير يعنى الموضوع داخلى فى الانسان اللى بيحس انه ملك الكون وهو ولا حاجة
ربنا يقينا شر انفسنا
نورتى يا دكتورة

wanna b a physician said...

سومه المجنونة

سبااااااااك ؟ ههههههههههه
وعلى فكرة انا عندى سماعتين مش واحده ماشى ولما ان شاء الله اشترى عربية هاوريكم الغرور بقا ومش هارد على التعليقات ههههههههههههههههههههههههههه
نورتى يا ريسه

wanna b a physician said...

الشارد

بص هو فعلا المجتمع عايز يتصلح فى حاجات كتير غلط بس ان المجتمع يفقد ترابطه يبقى ده نهايته زى مجتمعات كتير بره
ربنا يحمينا وينقذنا
نورت يا هندسة

wanna b a physician said...

ayman badr

حلوه الواحد اتفقع دى فعلا والله
وياسيدى هاروح لدكتور مع ان الواحد الحمدلله عارف نفسه ههههههههههههه ابقى تاعلى انت بس

يوميات فنانه مفروسه جداا said...

معلش يا دكتور انا عايزه اعرف اسم حضرتك عشان انت واخد دور ابو ياسمين في القصه وطبعا هتبقي بأسمك عادي وليك اسم شهره اللي هوا وأنا بي افيزكن

طبعا لو حضرتك مش موافق مش هزعل براحتك والله

تقبل مروري يا دكتور
سلام

wanna b a physician said...

فنانة مفروسة

يا فندم براحتك
انا اسمى احمد
ويا فنانة اسمها وانا بى افيزيشين
عشان الترجمة الهندى بس ههههههههههههه
وليا الشرف يافندم اكون فى القصة بس اوعى اكون وحش هههههههههههه

يوميات فنانه مفروسه جداا said...

وانا بى افيزيشين
هههههههههههههههههههههههههههه
ههههههههه وربنا هي كده
طيب انت بقي اللي غلطان من اول مره قاريتها غلط المفروض كونت تصلحالي يا دكتور احمد ههههههههههههه
ولعلمك علمك يعني انا واخده كورسات عنجليزي كتير جدا وربنا وبعدين دانت طالع في حتت دور ايه بقي جامد

متشكره جدا علي رد حضرتك
سلام

HANY YASSIN said...

عادى جداً
ولا يهمك فى كده كتير
مش مهم خالص

wanna b a physician said...

HANY YASSIN

هو فعلا مش مهم خالص
تحياتى

wanna b a physician said...

فنانة مفروسة

العفو يا فنانة
وانا هاستنى اشوف الدور ده

Ghada , Rofayda said...

فقدنا الحب فى تيار الحياة وفقدنا معه كل القيم....

ومع انعدام القيم والاخلاق نجد كل شئ مباح اعزك الله ...

التمس له العذر قد لا يكون رآك وان كان رآك وادعى عكس ذلك....

فاحمد الله على الفضيله التي تسكن فيك...
وهجرت الكثيرين.....

ولاتحمل لهم الا الشفقه على حالهم...

ادااام الله عليك الفضيله...

تحياااااااتي.....

فزلوكة said...

حصل خير
الموضوع مش محتاج النرفزة دى كلها

كل الحكاية إن ممكن يكون الأخ دا عندو مرض معدى أو حاجة
بسيطة يعنى

أما إذا كنت حضرتك بتتكلم عن علاقاتنا الإنسانية بشكل عام
فأحب أقول لحضرتك ,أنها نزعت عنها صفة الإنسانية
واستبدلت بالمادية
بس

عاليا حليم said...

الناس نسيت ان فى حاجة اسمها مودة وحب نسيت ان فى عشرة واخوة
نسيت ان فى حق جار وحق سائل
نسيت ان فى حق كبير وحق للصغير
نسيت حتى اداب الطريق اللى كانوا بيعلموها زمان فى المدارس

------------

هو دول بس الى الناس نسيتهم ؟ الناس نسيت حاجات كتير يا دكتور

wanna b a physician said...

Ghada & Rofayda

لا طبعا هو شافنى بس انا مش تفرق يعنى معايا
وبجد ربنا يديم علينا نعمته بعدم التكابر ولا التعالى
تحياتى

wanna b a physician said...

فزلوكة

لا هو الموضوع ينرفز مش الشخصى لا العام انتى لما تلاقى واحد تعرفيه كدا مش مهم لكن لما تلاقى كتير يبقى فى حاجات كتييييييييييييير غلط
تحياتى

wanna b a physician said...

عاليا حليم

اه طبعا الناس نسيت اكتر من كدا ولو فضلنا نعد مش هنخلص
بس اهم شىء الترابط والمودة لو اختفوا هتختفى كل حاجة معاهم
تحياتى وشكرا لمرورك الكريم

WhItE HeArT said...

[ص انا ليا وجهة نظر في المواضيع دي
ان انكك لازم تهملهم ولا حتى انك تكتب عنهم حاجة بجد ميستاهلوش تعبك في الكتابه حتى

وبجد المواقف دي اتعملت فيا اكتر من مرة ووالله مااتضايقت انا عارف قيمة نفسي ومركزي ومش مهم الناس رأيهم ايه

بجد تحياتي ومتضيقش نفسك يادكتور

wanna b a physician said...

WhItE HeArT

يا باشا انا مش ضايقت نفسى عشان حاجة
انا بس مضايقنى اللى وصل ليه حال الناس
مش موضوع عارف قيمتى او لا يعنى
شكرا لمرورك

خالتى بمبة said...

عندك حق حاجة تفرس وخصوصا لما يكون واحد انت عارف اصله وفصله ويتجاهلك كمان

PrInCeSS BeRy said...

هاى دكتور اخبارك اية فعلا كلامك حققيى على راى اللى قال بلد بتاعت شهاادات صحيح كبو هنا بالمحسوبية حتى بين الاشخاص حاجة غريبة بجد مصر ام الدنيا بتتاخر لية مش عارفة مع اننا اهل الجود والكرم هههههه

تحياتى

wanna b a physician said...

خالتى بمبة

اه شوفتى عامل فيها الملك تحتمس الاول
بلا وكسة
اهلا بيكى

wanna b a physician said...

PrInCeSS BeRy

اه بلد بتاعت شهادات ومندوبين مبيعات
ههههههههههههههههه
يلا ربنا يرزقنا ويرزق الناس كلها

funckydoctor said...

فعلا حاجة تفقع
انت قلت الكلام اللى يتقال كله
وعموما عندى ليك دكتور بيكتب علاج أعشاب تمام :D
تحياتى

كاتب مصري said...

تحيتي
الصراحة لم أقرأ البوست لأني الآن على عجل ولكنني سأعود حتما لأقرأه وأضع تعليقي
هذه المرة الأولى لي هنا وأحب أن أدعوك بدعوة مصحوبة بالفل والياسمين لزيارة مدونتي آملا أن لا أرد دون إجابة الدعوة ..
أنتظر زيارتك وتعليقك قريبا..أظنها ستروق لك
تحيتي
مدونتي هناhttp://kanyatklam.blogspot.com/

wanna b a physician said...

funckydoctor

لا ياعم خلينى كدا كويس مش عايز انا اعشاب ولا حاجة انا خفيت خلاص
تحياتى

wanna b a physician said...

كاتب مصري

شكرا لمرورك حتى من غير تعليق ولما اقدر هاعدى

الباحثة عن السعادة said...

ياعينى على اللى بيحصل
فكرتنى بالواد عوض ابن أختى بيعمل كدا برضو كل اما الواحد يهزر معاه يسوق فيها الدلال ويعمل انه مش واخد باله ويتنك فيها
وماتزعلش نفسك يادكتور اعمل دايما مع الناس دى زى ماعملت انا مع عوض اول مااشوفه اعمل انى نايمه
تقبل تحياتى

nonni said...

عندك حق تحس ان الناس بقت تخاف من بعضها ممكن تقول انالسبب هو ان احنا دلوقتى عايشين فى زمن المصالح الناس بقت تخاف تكلم بعض لحسن يطلب حاجة منه


"تحياتى"