Saturday, August 23, 2008

مصطفى

مصطفى ده مش اسمى ولا اسم واحد صاحبى ده اسم انسان كان نفسه يعيش وتكون العيشه هنيه وهنيه دى مش اختى ولا اخته لا دى السعادة بكل معانيها فى الدنيا ديه . بدء مصطفى يبص حواليه ويشوف ويفكر ازاى هيختار حياته ويبدء طريقه... بص شاف طفل صغير بيحبى على الأرض وأمه غايبه عنه وراها شغل عشان فلوس أبوه مش بتكفى إنهم ياكلوا. وأبوه مسافر بره ومش جنبه والواد بيصرخ اااااااااااه ومفيش ناس يسمعوه .

بص تانى فى ناحيه تانية شاف عيال كتير فى مدرسة مش لاقيين لا مدرس ولا مدرسة كلهم غايبين سابوا المدرسة وراحوا للدروس المتخصخصة (الخصوصية) عشان مرتبهم مش مكفى ومش مهم العيال تروح المدرسة. شافهم قاعدين فى زحمة وضيقة قاعدين على حرف الدكة واللى واقفين فى السكة مش لاقيين مكان .

بص ناحية تانية لقى واحد أكبر شوية بيقولوا عليه فى الثانوية ...... بينط من فوق سور مدرسته رايح فين .... رايح يلعب فى سايبر ولا يشرب شيشة عالقهوة ..... ليه كدا يابنى ؟ ياعم يعنى لو زاكرت هاعمل اية ما انا كدا كدا هاقعد عالقهوة.

بص هناك لقى شاب فى الجامعة سايب محاضرة وواقف مع واحده المفروض انها طالبه ....... يقولوه احضر وزاكر يقولوهم مش فاكر ما أنا هابقى اشترى مزكرة قبل الأمتحان فيها الخلاصة وكله هينجح واللى عايزينه يسقط هيسقط وان نجحت يعنى هاروح فين اهو هنا احسن عالاقل ابويا بيدينى المصروف بعد كدا هاقعد عالقهوة ومش الاقى شغله .........

بص ناحيه تانية لقى واحد أكبر شوية بيجرى ورا الفلوس عايز يلحق يكون نفسه ويلاقى عروسة تناسبه عشان سنة عدا التلاتين ومش لاقى وقت حتى يسأل على أهله ... بص ناحية تانية لقى أب بيحوش عشان ولاده يتعلموا وبالعافية يادوب بيقدر يكفيهم واهو حارم نفسه و حارمهم من حاجات كتييييييييييير ولا لاقى وقت يعترض على حاجة فى دنيته ويجيب منين وقت يعترض.

وبص فى ناحية تانية لقى ناس بتحاول تعترض على الحال اللى مش عاجبهم ومممنوعين منه ومتكبلين ومبعودين عنه وكل واحد غصب عنه غير كلامه وساب غيره لهمه .

وبص فى الشارع لقى دنيا زحمة ومواصلات مش نافعه ....وشباب عالناصية وبنات ماشيه وضلت طريقها....... وولاد بتشرب أى حاجة تقابلها وتقولك عشان تنسى........ وعيال بتشتم بعضها وتجرى بالعصى وتضرب اهلها.... وأهل متفرقين وأخوات متخاصمين وجيران مش طايقين كلمة من بعضهم ......وناس بتحكم ناس ومفيش عدل عندهم وناس بتكره السلام وناس بتحب تموت بعضها........ وناس عايشه فى الدمار وناس الدمار عشقها وناس تخون وناس تبيع أرضها وناس تشترى......... وناس بأرخض الأتمان تبيع عرضها وناس بتاخد حق غيرها ومش بتراعى ضميرها........... وناس بتاخد رشوة فى درج مكتبها عشان تمشى مصلحة غيرها وناس مش باقي عندها ضمير.... وناس ........وناس ......وناس...................

بعد ده كله مصطفى قرر يموت فى بطن امه ومش يتولد للحياة ويعيش اللى عاشه اللى قبل منه .

الموضوع مجرد اعادة نشر وليس جديد لحد ما ارجع كمان كام يوم ان شاء الله
قولت يمكن حد يقراه بدل زمان محدش قراه كتير يمكن انفع ههههههههههههههههههه
سلام

18 comments:

alshared said...

أكيد مصطفي ده مش مصري
لأنه لو مصري وبيحب بلده وطبعا البلد هيا الحزن الوطني كان شاف الحياه غير كده خالص
لأننا في مصر مفيش عندنا حد بيسافر بره علشان الفلوس ولا عندنا دروس خصوصيه علشان احنا أساسا مفيش عندنا تعليم
وكمان مفيش أزمة عنوسه
والحياه بمبي

اه أنا أسف لأني مش بزورك كتير بس ظروفي ملخبطه اليومين دول

تقبل تحياتي

يوميات فنانه مفروسه جداا said...

كلنا مصطفي للاسف الشدييييييييد!!!!

وانت كمان ظروفك النفسيه ملخبطه

ارحمنا يارب برحمتك

ربنا معاك وابقي اسأل

سلام

Anonymous said...

ياعينى عليك يامصطفى أحسنلك خليك فى المغارة وشغل يامصطفى يامصطفى
وكبر الطاسة ياجدع
تقبل تحياتى يامصطفى سورى يادكتور

yoyo said...

صباحك سكر
امممممم كلنا مصطفى يا عزيزى
دا مصطفى دا انت وانا والناس كلها
احنا بنحاول اننا نتعايش فى الدنيا وادينا بنحاول اهى ساعة تكون ماشية وساعة تكون بتزحف ولو انها بقى لها كتير بتزحف مش عارفة ايه مالها بقى هههههههههههه لحس تاخد على كدا وتبقى مشكلة بقى
الحياة كلها عاوزة يتعمل لها فورمات وننزل ويندوز نظيف كدا من الاول يعنى شغل على ميه بيضا بقى مش اى كلام امال ايه ههههههههههه
مش تغيبى عننا تانى يا دكتور
كل سنة وانت طيب
تحياتى
يويو

~*§¦§ Appy §¦§*~ said...

كل ده على فكرة كل اللى بتقوله بيحصل فى الدنيا كلها مش مصر بس

سومه...مجنونه فى بلد عاقل said...

ههههههههه اشك ان مصطفى كان بيحلم وكان متقل فى الاكل حبتين
نسيت تقول ان مصطفى عنده عيب فى فقراته العنقيه يعنى اصلا اصلا مبيعرفش يتلفت يمين او شمال مصطفى مش لاحق يبص غير تحت رجليه
وعموما اسم مصطفى دا غالى عليا احسنت اختيار الاسم ههههههه
ياله اشوفك على خير ان شاء الله ومتطولش غياب
تحياتى ليك سومه_87

wanna b a physician said...

فنانه مفروسه


اه شوفتى المدونين كلهم ظروفهم ملخبطة ماتقوليش فيروس عداهم
انا هاسأل يا امه الحاجة
كل سنة وانتى طيبة

wanna b a physician said...

alshared

هو تقريبا كدا اسمه مصطفى السعودى الهندى ههههههههههههه

ولا يهمك انا اصلا كنت غايب اليومين اللى فاتوا وبعدين خوفت يبعتولى اذن رفد على البيت قولت احضر بقا هههههههههههههه

تحياتى وكل سنة وانت طيب

wanna b a physician said...

yoyo

صباحك سكر ولو انى مش باحب كاظم بتاع صباحك سكر ده فصباحك سكر وعسل وكل حاجة حلوه

المشكلة بقا يا يويو مش لاقى نسخة ويدنوز نضيفة انزلها وارتاح وتقريبا مش هنلاقى اصلهم ضربوا كل النسخ

ان شاء الله مش هاغيب
كل سنة وانتى طيبة

wanna b a physician said...

اببى


اية ده انتى قلبتى ولا اية اغيب شوية ارجع الاقيكى كدا بقيتى تتكلمى زيهم والحاجات دى مش عندنا بس ابسوليوتلى دى فى كل العالم

بصى الحق فى حاجات موجوده فى كل العالم طبعا بس مش بالصورة البشعة دى
تحياتى وكل سنة وانتى طيبة

wanna b a physician said...

سومة المجنونة

لا معندوش عيب فى الفقرات العنقية ولا حتى القطنية هو كل ما حد يتولد
ياخد على قفاه تلاقى رقبته وطت كدا
ملوش دخل العيوب الخلقية
بس برضوة هو اللى معجب بالضرب
يلا اهى دنيا
سلام وكل سنة وانتى طيبة

wanna b a physician said...

غير معرف

اكبر الطاسة ازاى يعنى يعنى اشتريها تيفال ولا اية مش عارف
انا عاجبنى الحجم ده ومناسبنى الله
ومينفعش نكبر كفاية بقا
تحياتى وكل سنة وانت طيب

~*§¦§ Appy §¦§*~ said...

لا مش قلبت زيهم انا اساسا مش موافقه ههههههههههههههههه على الكالم بس بحاول امشى مع القطيع عععععععععع

wanna b a physician said...

اببى

ما انا عارفه يا ريسه بس بارخم مش اكتر

بنوتة مصرية said...

ياعم انت قهرتنى

انت جيت على الجرح وضغطت علية اوى

مااحنا عارفين كلنا ان الدنيا مليانة

نكد وهم وعارفين دة كلة

ويبقة انت اكيد اكيد فى مصر

wanna b a physician said...

بنوتة مصرية

انا مش عايز اقهرك ولا حاجة بس نفسى بقا نبقا كلمة واحده وبجد
تحياتى وكل سنة وانتى طيبة

أسيرة الأقدار said...

طيب مصطفى كان لسة فى ايده القرار
وقرر انه ميجيش يتعذب معانا
بس للاسف احنا مكنش عندنا حرية القرار ده وجينا غصب عن عنينا
ومدام جينا بئا يبئا لازم نعمل حاجة
هى اييييييييييييييييييه بالظبط
مش عارفة ...!!

انا اول مرة اعدى من هنا
بس بجد البلوج بتاعك حلو اوى
وان شاء الله مش هتكون اخر مرة
وترجع بالسلامة

wanna b a physician said...

أسيرة الأقدار

محدش فىايده يجى او يمشى من الدنيا بس بايدنا نعيش صح او غلط

اهلا بيكى وتنورى طبعا بتكرار الزيارة
وانا رجعت