Friday, April 4, 2008

هدومو عروسة



ما تستغربوش اوى كدا ... يابنى مش تتنح هاقولك دلوقت


هدومو عروسة يعنى هدوم (ملابس) للعروسة

ياعينى عالصبر شوفت يابنى الترجمة باعرف صينى او الصينى هو اللى بيعرفنى
الحقيقة ان الصينى هو اللى عرفنا وكشفنا وكل حاجة ممكن نتخيلها




واكبر دليل الشلالات الصينية ( قصدى الدلالات ) بس هما فعلا شلالات وانهمرت مياهها علينا وغمرتنا وغرقتنا
يوووووووووووووووه قول زى ما انت عايز مش كفاية انهم ماليين الاسواق بمنتاجتهم من الإبرة للصاروخ زى ما بيقولوا
بس الصاروخ ده اللى هو بتاع رمضان اللى العيال بتلعب بيه ( بووووووووووم على دماغ ابوهم وامهم )

الحكاية انى قاعد عند عمى وفجأة بنفتح الباب لقيت فى وشى ست مبجلة صينية الشكل لدغة ولا ما اعرف اية بتقول هدومو عروسة وبتنور فى ايدها بكشاف
اهو لو مش عندنا عروسة ناخد كشاف اى سبوبه للبنيه وخلاص
المهم قولنالها شكرا
قالت فى عروسة فوق ؟
قولنالها يمكن


المفروض ان احنا طبعا نرشدها دى ست غلبانه وشقيانه وبتجرى على الصين ( قصدى عيالها اللى فى الصين ) بس اكتشفت ان عيالها واقفين بره مش فى الصين
وطبعا لو دخلناها وقعدت تبيع كالعادة هتطلع من شنطتها كل حاجة وتقولك دى ب 60 دنية اللى هو جنية تقولها ب 20 تقولك ماشى خودها
خدنا ربنا يا شيخة حتى دى عرفتوها ( الفصال )


انا خايف الاقيها مطلعه عربية من شنطتها دى تكون مطبقة وبتتفرد ولا حاجة


بجد نفسى افهم لما احنا بنادى بمنع الباعة الجائلين والكلام ده سايبين دول بيبعوه بأى صفة
يعنى دى ولا خالتك ام محمد الدلالة ولا دى بتاعت الجمعيات جاية تكون جمعية عشان مزنوقه فى قرشين

دى جاية تعرض بضاعة من انتاج بلدها اولا
وتلغى منتجات كتييييييييييير بيسترزق منها ناس من البلد
ومابقوش لاقيين حاجة يبيعوها لان كله عند الست الدلالة فى الشنطة وبارخص الاتمان
ياترى الاقى معاها سماعة دكتور صينى حلوة كدا باتنين جنية ولا حاجة ؟
يا جماعة ارجوكم ارجوكم اوقفوا الشراء منهم مش تدوهم الفرصة يغرقوا اسواقنا ويقفلوا بيوت الناس
الناس دى تعمل اية بجد تعمل اية

اقولكم البسوا وش صينى ولفوا عالبيوت
وقولوا هدومو عروسة

20 comments:

Anonymous said...

الحق ع الست يعني اللي بتجهز العرايس:)

العيب مش عليهم العيب علينا احنا

Anonymous said...

هما عملوا اللي أحنا من المفروض أننا نعملوا

لو بصيت تلاقي الواحد منهم ماشي يلف بالبضائع بتاعته لحد لما كعوب رجله تورم
واحنا عايزين نشتغل في مكتب مكيف ونقبض بالألوف

العيب في ثقافة مجتمع
ثقافة مجتمع بتسمح ليهم انهم يشتغلوا في بلدنا مع اننا مش لاقيين شغل

حاجه تحزن

خالص تحياتي

Anonymous said...

السلام عليكم
انا فاكرة من كام سنة قبل ما ينتشر الصينى كدة
كنت انا وماما في زنقة الستات-اكيد عارفينها-والاقيلك الصينيين في كل حتة
ايامها انا كنت صغيرة بس قلقت قوى
دول مكانوش بيشتروا بس
بيتفرجوا
ويسالوا عن الاسعار
من الاخر بيدرسوا السوق
يعنى ناس بتشتغل صح
الدور والباقي علينا
عموما بعديها مشوفتش توكة مصري جوة الزنقة
ونقول ايه باه
يبقي احنا اكيد اكيد في مصر
والا كان حصل غير كدة

Anonymous said...

اسمحلي اولا اعمل كوبي لاحدي الجمل اللي كنت كتبتها في موضوع سابق علي مدونتي



**بعد أن أصبح فانوس رمضان صيني , والاصواف صيني , والجينيز صيني , والتفاح صيني , واليوسفي صيني , والاحذية صيني , والسيارات صيني , ومستحضرات التجميل صيني, وأدوات المطبخ صيني , والاكسسوارات صيني , والصيني أيضاً صيني , فأقترح أن نستورد كميات من الشعب الصيني لاستهلاك منتاجاتهم.

عارف المشكلة مش في الصينيين انت لو انتاج بلدك كويس هتشجع الناس انها تشتريه وتطرد الغزو الصيني دا , مصر كانت بلد زراعي , وبعدين حولوها لصناعي , وبعدين لسياحي
وحاليا لا عندنا زراعة ناجحة ولا صناعه منتجة ومش فاضل غير السياحة والحقيقة اننا موفرين للسواح الصيينين فرص جامدة جدا علشان ييجوا يتفسحوا ويسترزقوا في ان واحد

Anonymous said...

انا معاك فى ان غزوهم للسوق لايعطى لنا فرصة مماثلة ولكن بصراحة حاجتهم نضيفة ورخيصة فى نفس الوقت احنا بقى ماشاء الله الحاجة تقرف والاسعار نار ويوم مايبيعوا الحاجة رخيصة تطلع مضروبة واى كلام

Anonymous said...

daydreaming

اكيد العيب علينا



alshared

ثقافة المجتمع نبعت من اللى شايفه وبيحصل بس برضوة معاك حق


هبة الله

يبقى احنا اكيد فى مصر


سنوو

انا خايف اكون انا صينى ومش حاسس
وبعدين مفيش عندنا غير التسييح مش السياحة


monaliza

عندك الحق احنا بقينا غشاشين وحراميه بس بسبب الجوووووووووع وده طبعا مش مبرر

تحياتى للجميع

Anonymous said...

نى هاو..... يعنى اهلن وسهلن بالصينى
المهم
والله يادكتور الناس دلوقتى وفى ظل الوضع الراهن اللى احنا عايشينه بقت بتسترخص ون شالله يارب الحاجة تكون جاية منين مش هتفرق المهم الناس توفر قرش
وعارف انا اول ما دخلت الكليه ييجى من خمس سنين وشوية كده فى دكتور قالنا ان الحاجات الصينى دى كلها بتجيب كانسر وامراض وحشه ربنا يعافينا لأنها معمولة من الزبالة وقعد يحكيلنا حكاية ان الدول الكبيرة زى امريكا واتباعها كان عندهم زبالة وبيدفنوها وبعدين مباقوش لاقيين مكان للزبالة تانى وبقت بتمثل خطر كبير على الناس لحد ما الجماعة الصينى دول عرضو عليهم انهم ياخدوا الزبالة دى بس على شرط انهم ميتحملوش اى تكاليف نقل واخوانا التانيين مصدقوا... وقد كان كل البلاستيكات والشغل الحلمنتيشى ده من الزبالة
انا بصراحة قعدت فترة مقاطعاهم علشان موضوع الزبالة ده وكنت بزعق لما ماما تشترى ى طبق او صينية واقولها انتى بتحطيلنا الأكل دلوقتى ف زبالة
طبعا" طلعت هبلة م الناس كلها بتاكل اهى ومحدش بيقول العبط ده
بس بعد كده بقيت انا اللى اشترى بتعجبنى اوى الرسومات اللى على الصوانى والطباق ورخيصة ف نفس الوقت
ده م الآخر.........غزو صينى
عاوزين عرسان صينى بقى... لما يوصلوا ادينى خبر ماشى هههههه

Anonymous said...

مستجدة

ماهو اصلا الناس بتاكل حمير وكلاب هتفرق لما ياكلوا زبالة بس برضوة ناخد موقف مرة فى حياتنا بقا
مش باقولك انا خايف اكون انا صينى ومش حاسس العرسان قادمه بس خلى بالك بالريموت

Anonymous said...

dتصدق ان في حاجه كده كانت بتخليني اتكلم عن الموضوع ده بس كنت دايما باكسل
فعلا كترو قوي
بقو اكتر مننا ياعم بجد
والمشكله ان المنتج المصري المقابل لده اقل منه في الجوده واغلى منه في السعر
والانتاج المتميز بيتم تصديره تطبيقا لاتفاقية الكويز

فعلا مش عارف ايه الحل
بس انا عن نفسي مش هنفع اي صيني ولا هاشتري منه هدوم عروسه .. ولا هدومو عريس



سلامووووووووووووز

Anonymous said...

هههههههههههه

بص مسبوش حاجه ومعملوهاش من عربيات

لي فوانيس رمضان واخيرا نزلو جمبري وسمك

باسعار نص ثمن الاسعار بتاعتنا

تفتكر ده مش هيفرق مع الناس

اللعب ام 2.5 وادوات المنزل ام 2.5 واسعار خياليه

انا مش هنكر اني مدمنه لمحلات ام 2.5 بدفع فوق ال 50 جنية كل نزوله بسببهم بقي عندي ادمان

بس هما فعلا ماسورة وانفجرت في البلد

تحياتي
رودي

Anonymous said...

Iloved this post.
Have a nice weekend.

Anonymous said...

هوا إحنا لسه مجلناش حد منهم
لكن فى قرايبنا راحلهم والمشترك ما بين كل الناس إللى راحولهم
إنهم بيشتروا منهم من غير ما يحسوا
بمعنى إن الإخوة الصينين بيعرفوا يبيعوا كويس
كما أن الإخوة المصريين إللى هوا إحنا
بنعرف نشترى كويس
ودا الفرق
تلاقى الأخت الصينية جاية والإبتسامة منورة وشها
فى حين لو روحت لباءع مصرى هيكرهك فى اليوم إللى فكرت تشترى فيه

Anonymous said...

طب نعمل ايه ياجماعه المرتب مايستحمل حاجات غالية فالصينى مناسب طب خلاص قولوا لبابا يزود مصروفنا الشهرى عشان نعرف نشترى المصرى وتحيا مصر حكومه مستقله

Anonymous said...

soooo

كويز ورحمة الله وبركاته وسلملى عالشعب


بنوتة مصرية

2 كيلو جمبرى من الصينى لو سمحتى بس اتوصى وحلو ياحلو الصينى فتح هنا محله


david santos

thank you


فزلوكة

جايين جايين دول التتار مش بيسيبوا بلد الا لما يعدوا عليها



غير معرف


بابا معلش مانع المصروف اصل عنده ازمة مادية وتعيش الصين دولة بائعة متنقلة

Anonymous said...

http://salafiana.blogspot.com/2008/04/blog-post.html
حملة مقاطعة المنتجات الهولنديه .. هنا أغلب المنتجات الهولنديه شاركونا ولكم الأجر وأنشروها بارك الله فيكم

Anonymous said...

هههههههههه عندك حق والله

الموقف نفسه حصل عندنا من يومين كده بس كان راجل صيني

لو عدت عليكم بعد كده قلها يحنن واكيد هتفهم

Anonymous said...

والله عندك حق يا دكتور

Anonymous said...

هههههههههههههههه
انا اختي خريجه السن صيني وايطالي
ما سمعتش عن هدومو عروسه دي
هههههههههههههههههههههههههههه
شفتي ان البطاله عندهم ما فيش مع انهم مليار ليه؟؟؟ لأن في ناس عايزه تشتغل
أنا في ميت غمر عندنا معرض كامل في من الابره للصاروخ زي ما بتقولي والباعه صينيين واتعلموا عربي ومأأجرين المكان
ناس رجاله
واحنا خلينا مستنيين الحكومه تعينا
وابقا قابلني


موضوع لذيذ بجد

كدا تاني موضوع اعلق عليه اهووو
هاااااااااااااااااااا
ما تطنشيش

تحياتي

Anonymous said...

Dr.Mohammed Gohary

شكرا لمرورك يا دكترة

Anonymous said...

السلام عليكم ورحمة الله وبركاته

موضوع الانتاج الصيني غرق الأسواق المصرية من زمن يعني كل حاجة بنشتريها بيكون مكتوب عليها صنع في الصين حتى سجادة الصلاة والسبحة وففانوس رمضان طب بالزمة مش عيب في حقنا لما حاجة مش بيستهلكها غيرنا اصلا ومع ذلك بنشغل غير واحنا نستهلك وخلاص
ونشتكي من الطالة بعد كدة طب والله البطالة شوية علينا

وكان طبيعي بعد ما اخدوا العمالة وصنعوا كل حاجة انهم كمان يجيبوا اللى يبيع من عندهم عشان تبقى كملت بقى

ويارب نفوق بجد يارب


تحياتي