Wednesday, July 23, 2008

تلتزم بالقوانين ..... ولا




الحقيقة فكرنى المنظر بمحمد سعد وهو بيقول فى فيلم اللى بالى بالك
تلتزم بالقوانين تبقى صاحبى وحبيبى
فبصيت للمنظر فوق بالذات اول صورتين اللى بيوضحوا المنظر من جهتين مختلفتين والصورة التانية فيها خطين حمر
بيوضوحوا مدى خروجها عن المستوى الرأسى للعمارة ( او البلوك ) يعنى
واللى بيوضحوا كمان ان البالكونه دى معموله بكل اتجاهات العمارة
اما الصورة التالتة فدى نموذج للبالكونات الطايرة الشائعة فى المنطقة دى
الحقيقة كل لما اعدى واشوف حد عامل كدا اقول يا سلام وهى دى مش مخالفة وبتهدد العقار
يعنى طلع فى ناس مش بتلتزم بالقوانين وبتبقى صاحبى وحبيبى برضوة ما طلعش زى محمد سعد
واستفزنى اكتر الاخ الاولانى ده يعنى مش كفاه يعمل بالكون طاير لا الراجل لف العمارة كلها
تعالوا نعرف البالكونات دى بتتعمل ازاى
اولا بيدخل بالكونة شقته الاصلية ويضمها للشقة
ثانيا يبدء فى عمل هذة البالكونة طبعا عند الحداد
وبيبدء يخرم الحيطة يعنى الأخ ده فتح الحيطة من كل الاتجاهات عشان يمد اسياخ حديد يثبت بيها البالكونة الحديدية دى
وده ثقل زايد جدا جدا على العمارة وخصوصا انه كمان فى الدور قبل الاخير
واللى بيفهموا فى المعمار يعنى المهندسين وكدا اكيد هيكونوا على دراية اكتر
المهم طبعا ان العشوائيات بنادى بعدم وجودها كمناطق
لكن بنسمح بيها كحالات فردية طالما كله تمام وكله فاهمنى طبعا
يعنى انا لو واحد زى ده وعمل بالكونة زى دى فى شارع مدارى اقول اهم ماليين الدنيا ويمكن محدش شافهم
لكن ده حضراتكم على شارع رئيسى وحيوى ومهم وعينى عينك واللى مايشترى يتفرج على رأى المثل
لكن الحقيقة مش عارف اقول اية لانى بجد تعبت فى مخالفات عشوائية كتير اوى ومسكوت عليها
يعنى فيه بلاوى كتير وحاجات بتسبب تلوث وامراض
ان شاء الله لنا تواصل معها
اما الحالات دى فبجد عايز يتاخد خطوة جادة وكنت مُصر انى اصورها وياريت بجد اللى يعرف يوصلها لبرنامج او اى شىء ينهى الموضوع ده ويخليهم ياخدوا قرار ويزيلوا المخالفات دى
يقولى وانا هابعتله العنوان فورا
وشكرا لحسن تعاونكم معا
كان معكم احد الغاضبين من العشوائيات والمخالفات
من امام احدى فرندات الباهوات المخالفين

45 comments:

Anonymous said...

جزاك الله خير يا دكتور

ربنا يعينك وتقدر تعمل اي حاجه وعموما الناس بتعمل وخلاص وربنا يسترها علينا بقي

علي فكره ياسمين انا اسمي يا سميييييين

ههههههه اي خدمه

سلام يا دكتور احمد

Anonymous said...

تسلم والله يا دكتور
بس هى البلد دى بقيت كدا بقى طالما فى ناس بتعرف تسلك امورها من تحت التربيزة كل شىء بيمشى تمام وعال العال كمان يا عبد العال

مش فى تفكير بقى فى امان الناس ماهو المشكلة ان الشخص نفسه واقع عليه ضرر هو كمان بس احنا مشكلتنا كدا مش بنحسب بالحاجة الا لما تحصل وتخرب كمان زى البوليس كدا فى الافلام العربى مش بيجى الا لما العملية تكون خلاص كل سنة وانت طيب اهوا جاين منظر كدا

بوست هايل وملاحظة حلوة تسلم والله

تحياتى لك

يويو

Anonymous said...

ههههههههههههههههه
السلام عليكم
والله مش عارفة اقول غير مولد وصاحبه شايف وقابض علشان كدة ساكت
نورت مدونتي واتمنى دوام التواصل
تحياتي

Anonymous said...

الاول الف سلامه
ثانيا الراجل صاحب العماره بتاعتنا طلع بالخامس وطبعا دا ممنوع قام مقفله حب يطلع بالسادس بابا وقفله واشتكى وجاب البوليس هدمله الخامس ...الراجل بجح يقوله خاف على ولادك ....قاله ما انا عشان خايف عليهم هديتلك دا
الناس دلوقت مفيش ضمير ولا دم
تحياتى ليك سومه_87

Anonymous said...

ربنا يعينك يمان انتا بس توكل على الله وربنا هيوفئك ان شاء ارحمان

Anonymous said...

فنانة مفروسة

يارب الواحد يقدر يغير بجد والله المستعان

ما انا عارف يا فندم اسمك بس باهزر

تحياتى

Anonymous said...

نونو

اه مولد وصاحبه شايف وبيرقص فيه

تحياتى

Anonymous said...

yoyo

ماهى المشكلة انه محدش بيفكر فى امان الناس
ده حتى ده مش بيفكر فى امان نفسه غريبة
انا لو مكانه اخاف حتى اقف جواها
خواف بقا هههههههههههههههههه

تحياتى

Anonymous said...

سومه المجنونه


فعلا ولا ضمير ولا دم ولا ميه ومجارى حتى هههههههههههههههههه
بجد الواحد زهق زهق جدا

Anonymous said...

ادم المصرى


ربنا يكرم يارب ونقدر
ياريت تخلى بالك وانت بتكتب عشان الكلام بيتكت غلط

Anonymous said...

الف سلامة...

قوانين!!

انت بتتكلم على مصر يا دكتور...

عادى بقى

Anonymous said...

اشمعنى يعني الراجل ده اللي حيمشي عدل اذا كانت البلد كلها ماشية خلف خلاف
تلاقيه مخنوق في الشقة و حب يشم هواااااا بس بالغ شوية

ربنا كريم

اوروفوار

Anonymous said...

اولا اسفة علي التاخير
بس مش عارفة ليه مش بيظهر عندي مواضيعك الجديدة في البلوج ليست

ملاحظة جيدة
مخالفة وعشوائية
وفين المسئول؟!
انا نفسي اعرف اللي بيمسك مسئولية معينة ايه بيكون دوره , يعني هو مسك ليه المسئولية دي طالما مش قدها؟
فين القوانين , وليه القوانين دي مش بتطبق؟ وان طبقت ليه مش بتطبق علي الكل؟

رسالة قوية واتمني انها توصل , لان للاس محدش بيفوق الا لما الكارثة بتحصل

Anonymous said...

والله جزاكم الله خيرا على اللى انت عملته, وانا كتير بشوف عمارت زى كدا.... واقول حسبى الله ونعم الوكيل, دمت سااااااالم.... فى انتظار المزيد, وجعله الله فى ميزان حسناتك

Anonymous said...

ELGaZaLy


الله يسلمك
لا مش عادى احنا كفاية كدا بقا عايزنها مش عادى

Anonymous said...

bastokka طهقانة

ماهو لازم نعمل حاجة مش نفضل نقول كله ماشى خلف خلاف
مش ينفع ولا اية

تحياتى

Anonymous said...

سنووايت

يافندم ولا يهمك تتأخرى براحتك


اما المسئوليات فكل واحد دلوقت بيرمى المسئولية على غيره وغيره يرمى على حد تانى وهكذا
مبقاش فى ضمير جوه حد يخليه يعمل شغله بجد


تحياتى يا دكتورة

Anonymous said...

حنين..


ربنا يكرمك وياريت كلنا نتحرك عشان نغير بجد مش كلام وخلاص
تحياتى ليكى دومتى بالخير

Anonymous said...

السلام عليكم ورحمة الله وبركاته
كدا ماتسألش عليا يادكتور أغيب أغيب وتنفض طب إعمل خاطر للبسكويت اللى كلته ههههههههههه
دمت مبدعا يادكتور موضوع جميل وصحوه جديده للضمير اللى بجد نااااام كتييير أوى عاوزاك كدا دايما تشيرقنا مواضيع من دى خلينا نصحصح
بس هو فى الاساس يادكتور كل دا بيحصل لطمع الانسان طمع من الانسان اللى عمل كدا لانه مش مكتفى بحقه وطمع من المسئول انه عاوز يخزن فى بطنه خزين السنه وياكل وبرضوه مش هيشبع
ربنا يرحمنا بجد ويحمينا من جشع أنفسنا
تقبل تحياتى يادكتور

Anonymous said...

طيب والله العظيم بشوفها وبخاف خوف منها واصلا عمرى ما يجى ليه قلب لكده انى اقف فيها يعنى خاصه فى حاجه اسمها مش عارفه ايه عند شبرا لما بكون رايحه اوصل حد عبود دى الحته دى كتيرررررررر قوى بس انا مش عارف حاول تبعت للعاشرة مساءا

Anonymous said...

المظاهر دى للأسف بقت منتشرة
نتيجة فساد ورشوة ومحسوبية

الفكرة إن دى أرواح بنى آدمين..
لكن فين بقية سكان العمارة وإزاى موافقين على حاجة زى دى بتهدد حياتهم

أعتقد إن هما كمان لازم يكون ليهم دور

Anonymous said...

بص المصرين بيتفننوا فى مخالفة القوانين
واخدينها بالدراع و الفتونه و الفهلوه
و لو عاوز تعد المخالفاتززمش حتقدر
عادل امام كان ليه مقوله
بلد شهادات صحيح
انا بقى بقالى زمن بقول
بلد مخالفات صحيح

Anonymous said...

يعني الراجل معندوش بلكونه يعمل ايييييه؟؟؟؟؟
ماهو انتو كمان...ما تزنقوش على الراجل...عاوز يشم نفسه
ويتفشخر قدام اصحابه ان عنده بلكونه تلف العمارة
حقد
ناس وحشة حقوده
مش عندها بلكونة

ههههههههه
يالهوي لو عاوز بجد احكيلك على مخالفات افظع ممكن....ربك يستر و ما اكنش ماشي فى يوم تحت بلكونه منهم و الست مرات الراجل تكون من الوزن التقيل اللى ياخد البلكونه ويقع فوق نفوخي

Anonymous said...

ياليتنى كنت كمال الشاذلى ففعلت شيئا او حتى أحمد نظيف ففعلت أشياءا أو حتى سوزان مبارك ففعلت أضعاف الأشياء , ولكن ماباليد حيلة فالعين بصيرة واليد قصيرة والقدم مشلول الحركة.

من رأى منكم منكرا فليغيره بيده فان لم يستطع فبلسانه فان لم يستطع فبقلبه.
وهكذا أصبحنا كلنا نغير بقلوبنا لاننا عجزنا عن التغيير سواء بأيدينا أو حتى بألسنتنا.

أرجو أن تتقبل مرورى.........

Pusssssy

Anonymous said...

معلش يا فندم لا يوجد ما يدعو للاستغراب كل الحكايه ان في تعليق عند حد مش فاكراه مين كان بيقولك مستنين نعرف اسم مدونة خطيبتك بس والله ادي كل الحكايه وانا قولت امارخم عادتي يعني ولا هاشتريها بس اما لاقيتك مستغرب اوي كده قولت اما اوضح والله ماقصد حاجه يا بيه وربنا وربنا

Anonymous said...

ومن هنا فى سؤال بيطرح نفسه
ليه دايما الغاضبين من المخالفات المستفزة من قبل الشعب لايستطيعون تغييرها ولايملكون سوى الغضب

Anonymous said...

بلغتنا اخبار عن حادث انك اتكعبلت فى قنطه
ياريت تصححلنا المعلومه

Anonymous said...

دى مش عشوائيات يا عزيزى العشوائيات مالهاش لا اساس و لا عواميد اصلا

ربنا يرحم الى فيها
بالنسبة للعمائر و الحاجات دى كانوا بيقولوا فيه برنامج تقريبا عملاه الحكومة لتعديل الحاجات الى زى كده نسيت اسمه من كتر ما هو مش راضى يشتغل

Anonymous said...

الباحثة عن السعادة

بسكويت ايه اللى اكلته ده عامة ماشى

اما الطمع فالمفروض ان فى مثل الناس بتقوله الطمع يقل ما جمع يعنى هو كدا هينقص اكتر مش هيزيد وهيدمر كل حاجة

تحياتى

Anonymous said...

appy

هو بقى بيجيله قلب وكبد ومعدة وكل حاجة يقف فيها متأكد انها يوم ما تقع هتقع بالعمارة كلها

ربنا يسهل يا اببى تحياتى ليكى

Anonymous said...

فزلوكة

المشكلة ان الناس بتقولك ماهو لو كانوا عايزين يشيلوها كانوا شالوها
والباقى نفسه يعمل زيه بس مش لاقى فلوس
دنيا نعمل ايه بقا

Anonymous said...

واحدة مفروسة

بصى المخالفات اكتر من الانضباط فعلا بس لازم نبدء نغير والا
قولى على البلد السلام

نورتى

Anonymous said...

فرنسا والرايق

ماهو المصيبة انه كان عنده بالكونة
وضمها للشقة يعنى مصايب بتتحدف تقول ايه بقا على البنى ادمين

Anonymous said...

pusssssy

ان شاء الله هنقدر نغير باذن الله
وما ضاع حق وراءه مطالب
والله حسبنا ونعم الوكيل

Anonymous said...

فنانه مفروسه

يافندم اوعدك ان لو حصل اول حد يعرف هو انتى بس يبقى فيه مواضيع يعنى تقريها

Anonymous said...

موناليزا

لان الاغلبيه صامته والفرديه لا تغير شىء غالبا

Anonymous said...

سومه...مجنونه

قنطة اية يابنتى انتى شغاله نجار مسلح
انا الحمدلله سليم
اتكعبلت فى امتحان بس واتخنقت منه كمان

Anonymous said...

عاليا حليم

مش شرط تبقى زى العشش عشان تبقى عشوائيات
العشوائيات هى اجازء من المساكن مخالفه للقواعد وخلاص او اى شىء عشائى فى غير موضعه

شكرا لمرورك

Anonymous said...

معلش يا دكتور لكن هو ده حال المصريين

Anonymous said...

يا راجل صبح صبح وهدى نفسك كده
ما هو ممنوع ان الفلل تتهد فى المهندسين وكل شهر فيلا تتهد ويطلع مكانها برج والموضوع ماشى يعنى ما هى البلد ده كده بقت بتاع فلوس وربنا يتولانا

Anonymous said...

اول زيارة .....


مدونتك جميله وياريت يدوم التواصل



تحياتى

Anonymous said...

طال غيابك يا دكتور
يارب تكون بالف خير
فى انتظار عودتك وفى انتظار جديدك
دمت بكل خير
تحياتى
يويو

Anonymous said...

سبحان الله هى كانت قطه منين جات النون
اهو دا فى علم الكيبورد
ومعنديش بيه خبر

Anonymous said...

وانا بتفرج على الصور
ابتسمت وانا بتخيل صاحب الشقه بيرفع عليك قضية ..
ايوة انت مش واخد بالك انك صورت ممتلكاته الخاصه بدون اذن منه ..
هههههههههههه
أنا معمارية
وطبعا دي مهزلة ..
اذا ماكانتش تهدد البناء نفسه ..وحتى لو كانت الاحمال محسوبة ..
فهي مشوهة للمنظر العام ..
ده غير انها تعدي ..
وفوضى ..
ورشوة ووووو....
ياااه ده الصورة عليها كمية تعليقات ..

ربنا يهدينا ..
شكرا على البوست .
وعلى حرقة الدم (:
تقبل مروري ..و ..
تحيـــــــــــاتي

Anonymous said...

دكتور شاطر وشاعر جامد أوى وصحفى هايل