Friday, February 15, 2008

الأوله بسمله

جه جواب التنسيق بيقول انى دخلت كلية الطب ياحلاوة يا ولاد هابقى دكتور .
ومن يوميها واللى يقولى يا دكتور واللى يقول يا دوك والحمدلله محدش قالى يا دوج ولا يادك.. طور.

طبعا قبل الكلية قالك فى كشف طبى كشف طبى مين ليه داخل الجهادية يييييييييييييه قصدى الحربية ده انا قديم اوى .
قولت وماله نروح نكشف اهو نطمن عالصحة اللى مش موجوده اصلا واهى 20 جنية هندفعها ونعرف اية اللى عندنا ونتعالج لو فيه حاجة .... قشطة .

وروحت ياخويا ودخلت لقيت دكتوره زي الفل لابسه بالطو ابيض وماسكه سماعه....
اكشف صدرك... كشفت حطت السماعه وشالتها اتفضل روح .....
نعم أروح جاى من بيتنا عشان كدا يا نهار اية الجمال ده ؟ طيب ماشى حاضر هنروح شكرا .

وهكذا بدءت الكلية بخدعة الكشف الطبى ادفع كيف تكشف, فدفعنا ...... واتكشفوا هما,
ييييييييييييييه اهو بقا هنبدء نعك ونغلط فيهم, بلاش بلاش خلينا جنب الحيطة , صح كدا؟.

المهم انى طلعت سليم معنديش امراض طيب مش كانوا يحللولى انا باحب التحاليل اوى....
التحاليل الطبية مش الرياضية ما تفهمونيش غلط هما صحيح الاتنين هنا زى بعض غلط فى
غلط بس مش مهم اهو حاجة بتسلينا والسلام,
والسلام احسن من الحرب ,والحرب مش وراها غير الخراب ,والخراب بيجى من عدم الالتزام, والالتزام مش موجود عندنا, وعندنا كل حاجة تمام, تمام يا فندم المذنب فى الحبس, والحبس مش للمذنبين, والمذنبين احرار ,والاحرار مش عايشين, والعايشين مش لاقين اكل, والأكل عايز أرض, والآرض اتبنت مبانى, والمبانى بتقع على دماغنا, ودماغنا مليانه حاجات مش فاهمينها, وان فهمناها مش بنقدر نعملها ,وان عملناها مش بنكملها, وان كملناها بنموت بعدها

,هو فى اية اللى أنا باقوله ,
خلينا فى التحاليل الرياضيه اهو بتحس برضوة انك مش بتتفرج عالماتش وبس لا بتفهم بيحصل اية .قال يعنى خلاص لما الحكم يدى انذار لازم يشرحولنا ليه اده اللعيب ده انذار وهما اصلا عايزين الطرد من كل البرامج .

,خلينا فى الملوخيه احسن ,
الملوخية اكله جميله ممكن تاكلها ممكن تشربها لو عايز ولو مش بتحبها ممكن تشربها للى جنبك ,زى الملفات الكتير فى الشغل لما تديها لواحد بيحب يشتغل وتروح انت ما انت معزور وراك شغل تانى ,مش ده الموضوع اللى كنت باتكلم عليه ,
ياااااااااااه دايما بانسى يا جماعة قولت فكرونى انا نساى , أقصد الكلية , كلية اية ؟ كلية الطب يا جدعاااااااااااااااااااااااااااااااااااااااااااااااان.
..............

5 comments:

Ahmed Al-Sabbagh said...

صديقى العزيز

تصفحت مدونتك الجديدة واعجبتنى كثيرا

كل التحية والتمنيات بالتوفيق

اخوك احمد

wanna b a physician said...

اشكرك يا احمد واتمنى دوام التواصل اعجبتنى فرحتكم بالمنتخب
بنحبك يا مصر مهما كان وهتفضلى جوا قلوبنا على مر الزمان
بنحبك يا مصر يابنت الذين ومهما روحنا ولا جينا انتى أغلى الأوطان

Anonymous said...

عندك حق ياطبيب كليتنا بتبدأ بإكذوبة الكشف الطبي بس يارتهم يكشفوا على عقولنا الاول
أستمر أسلوبك راااااااااااااااااااائع جدااااااااااااااااااا

د/اجدع بنوته said...

هههههههههههههههههههههههههههه

هههههههههههههههههههههههههههه

مريت بكل اللى بتتكلم فيه ده

احسن حاجه ان طلبة طب كلهم دافنينه سواا

Anonymous said...

انت فعلا موهوب استمر ويمكن تبقى الدكتور الشاعر او الدكتور الناقم او الدكتور المحبوس جوه قضبان لكن فى النهاية هتفضل دوك