العِمة دى من عصر المماليك ولا المليميك

الحقيقة هو الاعلان بتاع الضرايب الاخير واللى قبله كلهم لذاذ والفنان محمد شومان دمه خفيف بس الضرايب دمها تقيييييييييييييييييييييييييييييييييييييييييييييييييل اوى على ناس كتير.

طبعا ده حق البلد ومحدش يقدر يقول عليه حاجة ,هو مش بالظبط , بس محدش يقدر لان الضرايب بتجيب فلوس من ناس معاها عشان نعمل مشاريع تخدم البلد ( اه والله تخدم البلد )
كل ما اعدى قدام محل افتكر الاعلان ده وابقى نفسى اقولهم العمة دى من عصر المماليك ولا المليميك ( حلوه المليميك دى جديدة ).

ليه بقا ؟ عشان كل ما اعدى قدام محل بتاع ملابس مثلا الاقيه كاتب السعر 50.99 طبعا 50 جنية وال 99 دى قروش هههههههههههههههههههههههههه
حلوه والله رجعنا لعصر القروش والملاليم عشان كدا باقولكم عصر المليميك.

واللى تلاقيه كاتب السعر 9.99 واللى كاتب 99.99 وهلمه جرا
والله ناس لذيذة ودمها خفيف يعنى انا لما ادخل اشترى هيدينى الباقى وقرش
هههههههههههههههههههههههههههه ولا هياكل عليا القرش
وطبعا القرش ده مش السمك لانه لو اداهونى هياكلنى لكن القرش ده هو احد العملات القديمة ايام الملك بقا وكدا ( عشان الناس الجديدة ) بتوع اليورو والجنية الدهب ( قصدى الجنية الفضة )

طبعا الناس الحلوة دى بتهرب بكدا من فئة محاسبة اعلى الى فئة محاسبة اقل
يعنى للى ملوش فى المحاسبات والضرايب وكدا
لما يقول ان السعر 50.99 قرش كدا مش دخل فى 51
ولما يقول ان السعر 9.99 كدا مش دخل فى 10
ولما يقول 99.99 يبقى مش دخل فى 100
وهكذا وهكذا .........................................

وبكدا يكون خرج بمكسب طبعا لان حضرتك لما تتحاسب على انك بتبيع القطعة دى ب 100 جنية غير لما تكون اقل من المية
ودى حاجات كلها بتحسب باختلاف السلعة ودى امور دقيقة مش هنتطرق ليها هنا
احنا طبعا بس بنتكلم عن العمة المليمية بشكل عام ومبسط
واضف عزيزى القارىء ( حلوة الجملة دى ) الى ذلك انه بيحط فى دفاتره انه استخدم الف لمبدة للانارة هذا العام واتكسر زجاج المحل وتم تجديده 10 مرات
وهكذا وهكذا ........................................

ويخرج فى الاخر ليه فلوس عندنا وعند الراجل اللى واقف بيتفرج قدام المحل ويخرج يطالبه بيها لانه مسكيييييييييييييييين وعايز يأكل ولاده اللى يا حرام بقالهم يومين نفسهم فى الباتون ساليه هههههههههههههههههههههه الحلو الساليه ده

يلا يابنى انت وهو نمشى بقا كفاية كدا مش نبص للناس فى لقمتهم لان اللى يبص فى حاجة غيره يزور

واخيرا احب التنويه ان فى ناس محترمه برضوة مش ننساهم
وسلام ختام ودقى يا مزازيك العمة دى بولتيك ومن عصر المليميك.