Saturday, March 15, 2008

فلاش باك ...........وأنا بافتح الشباك


طبعا كله بيسأل شباك اية ؟؟؟؟؟؟؟

مش شباك بيتنا ولا حتى شباك خالتك أم محمد لما تفتحه وتقف تبص تعدى خالتك أم على تقولها
ازيك ياختشى ؟ عامله اية؟
الحمد لله ياختشى عامله جمعية تخشى ؟؟؟
بس اقبضها الآول ....
وماله اّأقبضهالك وهى هتغلى عليكى ياختشى
ربنا يكرمك .... واية الأخبار ؟
أبدا اللى تنشك مرات ابنى مفيش فايده منها , والبت بنت زينات اتجوزت وقعت وقعه سقع بنت اللذين
ااااااااه ياختشى طول عمرها هى وأمها كدا
اااااه بلاش نجيب سيرة الناس .... اخش اشوف اللى عالنار

طبعا دى مش حكايتى .......

الحكاية والشباك كان شباك الآتوبيس , حيث انه فى يوم من الآيام قدر لىّ أن أركب الأتوبيس وأجلس وده معناه كبيييييييييييييييييير انى تقريبا قريب رئيس الهيئة او المعلم الكبير اوى سواق الأتوبيس , لأ وكمان جنب الشباك ........ المهم

كنت باصص قدامى وبعدين قررت اتنفس هواء أنقى قليلا من داخل الآتوبيس ,فنظرت جانبى وفتحت الشباك ....... وأنا بافتحه شوفت راجل عجوز كبير أوى فى السن يمكن يكون أكتر من 80 سنة بس واقف وعادى خالص والآتوبيس فضل ماشى وأنا لاوح دماغى وباصص ورا عالراجل العجوز ده وقعدت أسأل نفسى .....................


ياترى هأكبر لحد ما أبقى زيه ؟ ولو كبرت زيه ... هل هاكون مستعد للحظة الموت ؟
ياترى هأموت أنا الآول ولا هو ؟
ياترى هو بيفكر ونفسه يرجع صغير ... عشان مش يعمل الآخطاء اللى عملها
ياترى لما كان شاب زيى كان نفسه يرجع صغير لأن الذنوب ملت حياته ونفسه مش يكون عملها
ولا ماكنش عنده المغريات اللى موجوده فى زمنى أنا وكان أقل منى ذنباّ
الله اعلم ......................

ياترى تاب عن كل ذنوبه ؟
ياترى عنده أولاد ؟ وأد اية ؟
ياترى رباهم كويس وعلمهم الصح عشان مش يكرروا أخطائه ؟
ولا أهملهم وسابهم للدنيا تجيبهم يمين وشمال
ولو رباهم كويس واهتم بيهم ... ياترى هما بيراعوه دلوقت وفاكرين اللى عمله عشانهم ولا جاحدين بكل شىء قدمه؟
ولو مش أهتم بيهم ..... هل هما نسيوا ده وبيراعوه برضوة؟
ولا فاكرينه ومش قادرين ينسوه؟
ياترى أنا لو هابقى مكانه هأكون ربيت ولادى كويس .... علمتهم دينهم كويس
حزرتهم من مغريات الزمن والدنيا .... من الفتن اللى بقت ماليا الحياة

لو بقيت فى سنه هاكون عملت لمجتمعى حاجة كويسه
ولا هاكون زيى زى ناس كتير اتولدت وماتت ومش قدمت حاجة لغيرها
ياترى لو بقيت اده اللى يعرفونى هيكون حبين وجودى وسطهم
ولا هيكونوا بيتمنوا موتى ؟؟؟؟؟؟؟؟؟؟؟

ياترى هاكون توبت عن كل الذنوب واستغفرت ربنا وعدت اليه ولا لآ ؟
قعدت أقول لنفسى كلام كتيييييييييييير
أخره كان ياترى الآتوبيس ده لو عمل حادثة وخبط الراجل ده وموتنا دلوقت أنا وهو
ورغم طول عمره وقصر عمرى مين فينا ذنوبه هتكون أٌقل ويدخل الجنة ؟
الله واعلم .............................

واتاريه كان فلاش باك فى حياة الراجل العجوز بس نظرة مستقبلية فى حياتى أنا

13 comments:

Anonymous said...

كل دا حصل في الاتوبيس!!
هي عموما حاجة صحية جدا ان من فترة لاخري الواحد يراجع نفسه ويتامل شوية في تصرفاته وفي حياة الناس اللي حواليه
انا بقي لما بابص لاي حد عجوز باقول لنفسي حاجة واحدة:
هي دي الدنيا

Anonymous said...

اية ده انتى عمرك ماركبتى اتوبيس وشوفتى بيقعد اد اية
وطبعا هى دى الدنيا فانيه

Anonymous said...

تصدق والله الموقف ده بيحصلى انى لما اشوف حد عجوز بقعد شويه كده اسئل بس مش كل الأسئلة دى
ده انت يابنى لخصت التمانين سنة اللى هيا عمر الراجل ف شوية أسئلة
وفعلا" هيا دى الدنيا.... وبناخد منها أيه ف الآخر....ولا حاجة
" أجرى يابن آدم جرى الوحوش ....غير رزقك لن تحوش"
بس يارب ربنا يوفقنا لحاجه حلوة تقعدلنا ويتكتبلنا ’حسن الخاتمة
أعمل اللى عليك وسيب الأسئلة دى للزمن
ربنا يهدينا كلنا
تحياتى ليك

Anonymous said...

وانت بتعمل الفلاش باك النور ضرب فى عينى
ابقى خلى بالك

Anonymous said...

مستجدة

كلنا سايبينها على ربنا دى مجرد تنشيط للافكار وترتيب حتى لا يضيع العمر هباءّ
سلامى ليكى

صحفية روشة

وانتى ليه واقفه قصادى انا باصور حد غيرك
شكرا لمرورك

Anonymous said...

اتوبيس ايايا ازاى تركب اتوبيس انت غنى اووى احنا بنخدها مشي
هههههههههههه
بوست حلو اوى وكويس انو في ناس بتفكر كده
تحياتى

Anonymous said...

ma2tshren

ما انا باقولك كان يوم غريب

Anonymous said...

يافلاشااااااتك يادوووك

دى كلها كمية ياترى ؟؟

ربنا يقويك وتربيهم صح ويبقوا بارين بيك

بس ربنا يقدرك وتجيبهم الاول

وتكبر وتبقى حياتك كلها بساتين م الحسنات

يديك طول العمر

Anonymous said...

هو فعلا لازم يبقي الفلاش كبير قوي يا دكتور تلاقيك كنت راكب الاتوبيس من اول الخط لاخره ودا في الغالب بياخد حوالي 3 ايام ودا حظك بقي ابقي اركب المترو وهتلنا فلاش من هناك ودا ع الاقل معروف ساعتين زمن بس تكون اتخنقت.

Anonymous said...

د/اجدع بنوته

شكر ليكى على الدعوة

واحد بيدور على قلبه

ان شاء الله هاركب المترو واقولك حصل اية
تحياتى

Anonymous said...

اللي يركب الأتوبيس يا ما يشوف
أكتر حاجة بتعجبني في وسائل المواصلات انها بتدينا وقت نعرف اكبر عدد من الناس في وقت بسيط

Anonymous said...

حاسبوا انفسكم قبل ان تحاسبوا فان اليوم عمل بدون حساب وغدا حساب بدون عمل

تشكر عالتذكره يا دكتور

Anonymous said...

ياترى الآتوبيس ده لو عمل حادثة وخبط الراجل ده وموتنا دلوقت أنا وهو
عارفه كان ايه اللي هيحصل

ماكنتيش هتكتبي الموضوع دا
وطبيعي جدا اني ما كنتش هعلق عالموضوع لانه ما كانش هيبقا موجود

هههههههههههههههههههههههههههه

أضحكني تفكيرك الطويل


تحياتي